កំពត៖ កាលពីរសៀលថ្ងៃទី៣១ ខែតុលា ឆ្នាំ២០២១ កម្លាំងនគរបាលខេត្តកំពតបានបញ្ជូនបុរសម្នាក់ ទៅកាន់តុលាការ ក្នុងករណីសង្ស័យប្លន់និងរំលោភសេពសន្ថវៈលើកុមារីម្នាក់។
បើតាមប្រភពពីមន្ត្រីនគរបាលបានឱ្យដឹងថា ជនសង្ស័យខាងលើមានឈ្មោះផាត ចិន្តា អាយុ ៣៤ឆ្នាំ រស់នៅភូមិថ្មី ឃុំព្រែកក្រឹស ស្រុកកំពង់ត្រាចខេត្តកំពត។ គួរបញ្ជាក់ថាកាលពីរំលងអធ្រាត្រឈានចូលថ្ងៃទី១៨ ខែតុលា ឆ្នាំ២០២១ មានករណីប្លន់ និងរំលោភសេពសន្ថវៈលើក្មេងស្រីជាអីតិជនម្នាក់ ដែលរស់នៅភូមិប្រភ្នំ ឃុំប្រភ្នំ ស្រុកអង្គរជ័យ ។
មន្ត្រីដដែលបានបន្តថា ក្រោយកើតហេតុ គ្រួសាររងគ្រោះបានប្តឹងសមត្ថកិច្ចដោយរៀបរាប់ថា មានជនមិនស្គាល់មុខ ៣នាក់បានគាស់បង្អួចសម្រុកចូលប្លន់ ហើយចាប់រំលោភកុមារីពីរនាក់ មានអាយុ១៣ឆ្នាំ និង១៧ឆ្នាំរហូតបានសម្រេច។ នៅក្នុងហេតុការណ៍នេះ គ្រួសាររងគ្រោះបានបាត់កងដៃប្លាទីន ខ្សែកប្លាទីន ទូរសព្ទ១គ្រឿង លុយបីម៉ឺនរៀល និងម៉ាស៊ីកាត់ស្មៅមួយគ្រឿង។ នៅចំពោះមុខសមត្ថកិច្ចជនសង្ស័យបានសារភាពថា ពួកគេមានគ្នាបីនាក់ពិតជាបានប្រព្រឹត្តដូចការចោទប្រកាន់មែន។ នៅពេលនេះសមត្ថកិច្ចបានធ្វើការកសាងសំណុំរឿង ដើម្បីធ្វើការដោះស្រាយតាមផ្លូវច្បាប់៕
