ក្រុមហង្សក្រហម Liverpool ធានាបាន ៣ពិន្ទុពីការប្រកួតវគ្គចែកពូល UEFA Champions League នៅទឹកដីរបស់ Atletico Madrid កាលពីយប់ថ្ងៃអង្គារនេះ ដោយលទ្ធផល ២-៣។
ក្រុមភ្ញៀវហង្សក្រហមមានឱកាសរកគ្រាប់បាល់នាំមុខ២គ្រាប់ដោយ Mohamed Salah និង Naby Keita ប៉ុន្ដែត្រូវបានក្រុមម្ចាស់ផ្ទះតាមស្មើវិញដោយ Antoine Griezmann។
ខ្សែប្រយុទ្ធបារាំងរកបានពីរគ្រាប់សម្រាប់ Atletico ក្នុងតង់ទី១ ប៉ុន្ដែគេទទួលបានកាតក្រហម ហើយត្រូវបានបណ្ដេញចេញពីទីលាន មុនពេល Salah ស៊ុតប៉េណាល់ទីគ្រាប់ជ័យជម្នះសម្រាប់ក្រុមលោក Jurgen Klopp ខណៈ VAR បានលុបចោលបាល់ ១១ម៉ែត្រសម្រាប់ Atletico។
ក្រោយពេលអាជ្ញាកណ្ដាលផ្លុំកញ្ចែបញ្ចប់ការប្រកួត លោក Diego Simeone បានដើរយ៉ាងលឿនចូលទៅក្នុងបន្ទប់ផ្លាស់សម្លៀកបំពាក់ ដោយមិនរង់ចាំចាប់ដៃគ្នាជាមួយលោក Klopp ឡើយ ដែលធ្វើឱ្យគ្រូបង្វឹកជនជាតិអាល្លឺម៉ង់ បង្ហាញអារម្មណ៍មិនពេញចិត្តចំពោះអាកប្បកិរិយានេះ។
លោក Klopp បានថ្លែងប្រាប់ BT Sport បន្ទាប់ពីចប់ការប្រកួតថា៖ «ស្ថានភាពគឺបង្ហាញយ៉ាងច្បាស់ថា ខ្ញុំចង់ចាប់ដៃជាមួយគាត់ តែគាត់មិនចង់ឡើយ។ ប្រតិកម្មរបស់គាត់ ពិតជាមិនត្រឹមត្រូវទេ ខ្ញុំក៏បានធ្វើចិត្តត្រជាក់ដែរ ប៉ុន្ដែយើងទាំងពីរមានអារម្មណ៍រំជើបរំជួល»។
«នៅពេលដែលខ្ញុំឃើញគាត់លើកក្រោយទៀត យើងនឹងចាប់ដៃគ្នា។ គាត់មានអារម្មណ៍ខឹងសម្បារ មិនមែនជាមួយខ្ញុំនោះទេ ប៉ុន្ដែខឹងនឹងការប្រកួត ហើយវាគឺបែបហ្នឹង»៕
សូមទស្សនាវីដេអូខាងក្រោម៖
https://www.youtube.com/watch?v=8nENt78RARE
