អតីតកីឡាកររបស់ក្រុម Real Madrid លោក Jorge Valdano បានបង្ហាញពីដំបូន្មានរបស់ Cristiano Ronaldo ចំពោះខ្សែប្រយុទ្ធ Karim Benzema ដែលបានជួយឱ្យកីឡាករបារាំងរូបនេះ មានភាពប្រសើរឡើងនៅឯកីឡដ្ឋាន Santiago Bernabéu។
ថ្លែងទៅកាន់ La Galerna លោក Valdano បានបញ្ជាក់ថាការផ្លាស់ប្តូរទម្រង់លេងរបស់ Karim Benzema បានមកពីការសន្ទនាជាមួយ Cristiano Ronaldo ។ ម្ចាស់ពានរង្វាន់ Ballon d’Or ៥ សម័យបានណែនាំ Benzema ឱ្យផ្លាស់ប្តូរវិធីសាស្ត្រលេងរបស់គាត់ ប្រសិនបើគាត់ចង់ជោគជ័យនៅ Real Madrid ។ Valdano បានបង្ហាញថា៖ «មនុស្សឆ្លាតវៃគឺឆាប់ចាប់បានដំបូន្មានល្អៗ ហើយការចាកចេញរបស់ CR7 កីសំខាន់ដែរសម្រាប់ Benzema ព្រោះវាបានបង្ខំឲ្យគាត់ទទួលបានតួនាទីសំខាន់ក្នុងក្រុម»។
Karim Benzema និង Cristiano Ronaldo អ្នកទាំងពីរបានមកដល់ Real Madrid ក្នុងរដូវកាលដោះដូរកីឡាកររដូវក្ដៅកាលពីឆ្នាំ ២០០៩។ ទោះយ៉ាងណាតារាឆ្នើមសញ្ជាតិព័រទុយហ្កាល់ តែងតែត្រូវបានគេចាត់ទុកថាជាខ្សែប្រយុទ្ធសំខាន់របស់ Los Blancos។ Cristiano Ronaldo រកបាន ៤៥០ គ្រាប់សម្រាប់ក្រុម Real Madrid ក្នុង ៤៣៨ ប្រកួត៕
