ម្ចាស់ពានរង្វាន់ Ballon d’Or ពីរសម័យកាល និងវីរបុរសប្រេស៊ីល Ronaldo បានបង្ហាញពីការជ្រើសរើសរបស់គាត់ សម្រាប់កីឡាករល្អបំផុតប្រចាំឆ្នាំ ២០២១ ។ Ronaldo ជឿជាក់យ៉ាងមុតមាំថាកីឡាករដែលនឹងឈ្នះពានរង្វាន់ Ballon d’Or នៅឆ្នាំនេះមិនមែន Lionel Messi, Cristiano Ronaldo និង Robert Lewandowski នោះទេ ប៉ុន្តែគឺ Karim Benzema គួរតែឈ្នះពានរង្វាន់នេះ ។
Ronaldo បានបញ្ចេញមត្តិនៅក្នុងបណ្តាញ Instagram ថា៖ «ដោយគ្មានការសង្ស័យបេក្ខជនរបស់ខ្ញុំសម្រាប់ពានរង្វាន់ Ballon d’Or គឺ Benzema ។ ខ្សែប្រយុទ្ធល្អបំផុត និងមុតស្រួចអស់រយៈពេល ១០ ឆ្នាំមកហើយ ព្រមទាំងជួយឲ្យក្រុមឈ្នះពានរង្វាន់ជាច្រើន តើអ្នកគិតអញ្ចឹង ឬទេ?»
គួររំលឹកឡើងវិញថា Benzema បានស៊ុតបាល់បញ្ចូលទី ១០ គ្រាប់រួចមកហើយ និងបានបញ្ជូនបាល់ឲ្យមិត្តរួមក្រុមស៊ុតបញ្ចូលទីបាន ៧គ្រាប់ក្នុងការបង្ហាញខ្លួន ១០លើកសម្រាប់ក្រុម Real Madrid នៅរដូវកាលនេះ។ Benzema ក៏បានដើរតួយ៉ាងសំខាន់ផងដែរ នៅពេលដែលបារាំងឈ្នះពានរង្វាន់ UEFA Nations League ។ ដូច្នេះហើយកីឡាករសញ្ជាតិបារាំងរូបនេះ មានភាគរយខ្ពស់នៅក្នុងការប្រកួតប្រជែងដណ្តើមពានរង្វាន់ Ballon d’Or ៕
