លោក Ian Rush ដែលជាអ្នករកគ្រាប់បាល់នាំមុខគេរបស់ក្រុមហង្សក្រហម Liverpool ជឿជាក់ថា Kylian Mbappe ស័ក្តិសមបំផុតសម្រាប់ក្រុមហង្សក្រហម មិនដូចទៅនឹង Erling Haaland ឡើយ។
បុរសវ័យ ៥៩ ឆ្នាំរូបនេះមានអារម្មណ៍ថា Mbappe អាចត្រូវនឹងទម្រង់លេងរបស់ Liverpool ខណៈដែល Haaland នឹងត្រូវសម្របខ្លួនតាមយុទ្ធសាស្ត្ររបស់ហង្សក្រហម។ គាត់ក៏បានបញ្ជាក់ផងដែរថា Erling Haaland គឺជាអ្នករកគ្រាប់បាល់ដែលពឹងផ្អែកលើមិត្តរួមក្រុមបញ្ជូនបាល់ឲ្យ ខណៈដែល Kylian Mbappe អាចបង្កើតឱកាស និងរកគ្រាប់បាល់បានដោយខ្លួនឯង។
បច្ចុប្បន្នក្រុមហង្សក្រហម Liverpool គឺជាក្រុមមួយដែលយើងអាចនិយាយបានថា មានតំបន់ប្រយុទ្ធល្អនៅក្នុងពិភពបាល់ទាត់។ ទោះយ៉ាងណាក៏ដោយ Mohamed Salah និង Sadio Mane ជិតឈានចូលវ័យ ៣០ ឆ្នាំហើយ ខណៈដែល Roberto Firmino ទើបតែឈានចូលវ័យ ៣០ឆ្នាំ ដែលបច្ចុប្បន្នហង្សក្រហមមានតែ Diogo Jota ដែលនៅក្មេង ហើយអាចជាផ្នែកមួយក្នុងតំបន់ប្រយុទ្ធរបស់ក្រុម សម្រាប់ពេលខាងមុខ។
ដែលតម្រូវឲ្យក្រុមហង្សក្រហម Liverpool នឹងត្រូវចំណាយលុយច្រើន ដើម្បីទាក់ទាញខ្សែប្រយុទ្ធឆ្នើមៗ មកជំនួសកន្លែងរបស់ Firmino និង Mane៕
