អតីតតារាឆ្នើមរបស់ក្របខ័ណ្ឌ Premier League លោក Danny Mills ជឿជាក់ថា Newcastle United គួរតែជួលអតីតអ្នកចាត់ការក្រុមតោខៀវ Chelsea លោក Jose Mourinho ដើម្បីជំនួសតំណែងលោក Steve Bruce បន្ទាប់ពីការកាន់កាប់ដោយម្ចាស់ថ្មី។
Newcastle ត្រូវបានគេរំពឹងថានឹងចែកផ្លូវជាមួយអ្នកចាត់ការលោក Bruce នៅប៉ុន្មានសប្តាហ៍ខាងមុខនេះ ព្រោះបច្ចុប្បន្នក្លឹបកំពុងឈរនៅលេខរៀងទី ១៩ ក្នុងតារាង Premier League ហើយមិនទាន់ឈ្នះការប្រកួតលីកនៅរដូវកាលនេះទេ។
ការទិញយកក្រុម Newcastle របស់អារ៉ាប៊ីសាអូឌីតគ្រុប បានធ្វើឱ្យកក្រើកលីកនៅអង់គ្លេស ហើយវាបានធ្វើឱ្យអ្នកគាំទ្រ និងអ្នកជំនាញឆ្ងល់ថា តើនឹងមានអ្វីផ្លាស់ប្តូរសម្រាប់ក្លឹបនៅប៉ុន្មានខែខាងមុខនេះ។ Danny Mills ជឿជាក់ថាក្លឹបគួរតែជួលលោក Jose Mourinho ធ្វើជាអ្នកចាត់ការថ្មីរបស់ពួកគេ ព្រោះគាត់នឹងអាចដឹកនាំក្លឹបឱ្យទទួលបានជោគជ័យ។
Mills និយាយទៅកាន់ talkSPORT ថា៖ «ប្រសិនបើអ្នកឱ្យលុយ Jose គ្រប់គ្រាន់ ហើយអនុញ្ញាតឱ្យគាត់ធ្វើអ្វីដែលគាត់ចង់ធ្វើ គាត់នឹងដឹកនាំអ្នកទៅរកភាពជោគជ័យលឿនជាងអ្នកដទៃ»។ «ប្រសិនបើពួកគេចង់លោតឡើងដល់ចំណាត់ថា្នក់កំពូលទាំង៤ ខ្ញុំមិនឃើញមានអ្នកណាល្អជាង Mourinho នោះទេ ហើយអ្នកត្រូវតែផ្តល់សិទ្ធឲ្យគាត់ទិញកីឡាករដែលគាត់ចង់បាន»។
បញ្ជាក់ផងដែរថា អតីតគ្រូបង្វឹកក្រុម Manchester United និង Tottenham បច្ចុប្បន្នគឺជាអ្នកចាត់ការទូទៅរបស់ AS Roma ។ អ្នកចាត់ការសញ្ជាតិព័រទុយហ្កាល់រូបនេះ មានការចាប់ផ្តើមដ៏គួរឱ្យចាប់អារម្មណ៍នៅក្រុម Roma ដែលឈរនៅលេខ ៤ ក្នុងតារាងលីក បន្ទាប់ពីឈ្នះ ៥លើក ក្នុងចំណោមការប្រកួតបើកឆាក ៧ លើករបស់ពួកគេ៕
