Luis Suarez បានបង្ហាញថាគាត់បានស្នើសុំឱ្យ Barcelona ចុះហត្ថលេខាជាមួយ Darwin Nunez នៅពេលគាត់នៅក្លឹប Almeria ។ ទោះយ៉ាងណាក៏ដោយក្លឹបបានសម្រេចចិត្ត មិនធ្វើឱ្យកិច្ចព្រមព្រៀងនេះកើតឡើង ហើយខ្សែប្រយុទ្ធរូបនេះបានបញ្ចប់ការចូលរួមជាមួយក្លឹប Benfica ។
Barcelona ស្ថិតនៅក្នុងវិបត្តិហិរញ្ញវត្ថុ ហើយមានបញ្ហាជាច្រើននៅលើទីលានផងដែរ។ ក្រុមយក្សកាតាឡានត្រូវការខ្សែប្រយុទ្ធ ហើយបើយកបានកីឡករ Darwin នឹងល្អសម្រាប់ពួកគេ។
Luis Suarez អះអាងថាគាត់បានស្នើសុំឱ្យ Barcelona ធ្វើកិច្ចព្រមព្រៀងមួយសម្រាប់ Nunez ខណៈដែលខ្សែប្រយុទ្ធរូបនេះនៅតែស្ថិតក្នុងប្រទេសអេស្ប៉ាញស្រាប់ ហើយវានឹងត្រូវចំណាយប្រាក់ប្រហែល ១៥-២០ លានផោន។ ឥឡូវនេះខ្សែប្រយុទ្ធរូបនេះធ្វើបានល្អនៅ Benfica ហើយមានតម្លៃខ្លួនប្រមាណ ១០០ លានផោន។
នៅពេលនិយាយនៅក្នុង Twitch របស់ Gerard Romero គាត់បាននិយាយថា៖ «នៅពេលគាត់នៅ Almeria ខ្ញុំបាននិយាយនៅ Barcelona ពួកគេបានសួរខ្ញុំ ហើយខ្ញុំនិយាយថា យកចិត្តទុកដាក់ជាមួយក្មេងម្នាក់នេះ គាត់មានចំនុចគួរឱ្យចាប់អារម្មណ៍។ ប៉ុន្តែពួកគេឆ្លើយថា ទេគាត់នៅក្មេងណាស់។ ប៉ុន្តែបើពេលនោះពួកគេសម្រេចចំណាយ ១៥-២០ លានផោន ដើម្បីចុះហត្ថលេខាជាមួយ Darwin Nunez មកដល់ពេលនេះ ពួកគេនឹងចំនេញប្រាក់យ៉ាងសន្ធឹក»៕
