តារាឆ្នើមអាហ្សង់ទីន Lionel Messi ត្រូវបានគេរំពឹងថា នឹងបង្ហាញខ្លួនជាលើកដំបូងរបស់ខ្លួនជាមួយក្រុម PSG ក្នុងការប្រកួតទល់នឹងក្រុម Reims នៅថ្ងៃនេះ។ ម្ចាស់ពានរង្វាន់ Ballon d’Or ៦ សម័យកាល បានបញ្ចប់ការផ្លាស់ប្តូរដ៏គួរឱ្យចាប់អារម្មណ៍មួយទៅកាន់ PSG កាលពីដើមខែនេះ និងបានធ្វើការហ្វឹកហាត់ជាមួយមិត្តរួមក្រុមថ្មីរបស់គាត់ អស់រយៈពេលជាង ២ សប្តាហ៍ហើយ។
អ្នកគាំទ្របាល់ទាត់ទូទាំងពិភពលោក បានរង់ចាំយ៉ាងអន្ទះសារចង់ឃើញ Lionel Messi ចូលរួមជាមួយក្លឹបថ្មីរបស់គាត់ ហើយគាត់អាចចូលទីលានជាមួយមិត្តជិតស្និទ្ធគឺ Neymar។
នៅពេលត្រូវបានសួរអំពីលទ្ធភាពបង្ហាញខ្លួនដំបូងរបស់ Lionel Messi ទល់នឹង Reims អ្នកចាត់ការ Mauricio Pochettino បាននិយាយថា៖ « គាត់គឺជាកីឡាករអាជីពដ៏អស្ចារ្យម្នាក់ ដែលសម្របខ្លួនយ៉ាងរហ័សជាមួយនឹងមិត្តរួមក្រុមថ្មីរបស់គាត់ និងបរិបទថ្មី។ គាត់មានសមត្ថភាពសម្របខ្លួនទៅនឹងលីកថ្មី» ។
Kylian Mbappe ត្រូវបានផ្សារភ្ជាប់ជាមួយនឹងការចាកចេញទៅកាន់ក្លឹប Real Madrid ក្នុងរយៈពេលប៉ុន្មានថ្ងៃចុងក្រោយនេះ ហើយអ្នកគាំទ្រអាចខកខានលទ្ធភាពនៃការប្រកួតរបស់ MNM នោះគឺ Messi, Neymar និង Mbappe លេងជាមួយគ្នា។
ទោះយ៉ាងណាលោក Pochettino បានបញ្ជាក់នៅក្នុងសន្និសីទសារព័ត៌មានមួយកាលពីថ្ងៃសៅរ៍ថា កីឡាករទាំង ៣ រូបនេះប្រហែលជានឹងត្រូវដាក់បញ្ចូលក្នុងការប្រកួតនៅថ្ងៃតែមួយ ដោយលោកបន្តថា៖ «យើងត្រូវការវិភាគ ហើយយើងនឹងសម្រេចចិត្តនៅពេលក្រោយ។ ពួកគេប្រហែលជាអាចបង្ហាញខ្លួនរួមគ្នានៅលើទីលាន»៕
