ក្រុមសេះបង្កង់ Juventus បានត្រៀមជិតរួចរាល់ ក្នុងការលក់ខ្សែប្រយុទ្ធ Cristiano Ronaldo ទៅឱ្យ Manchester United នៅពេលដ៏ខ្លីខាងមុខនេះ ស្របពេលដែល Eden Hazard របស់ Real Madrid ជាកីឡាករគោលដៅ ដែលពួកគេចង់បានមកជំនួស ខ្សែប្រយុទ្ធព័រទុយហ្កាល់។
តារាឆ្នើមសញ្ជាតិបែលហ្ស៊ិក Hazard ស្ថិតនៅកំពូលតារាងនៃបញ្ជីកីឡាករក្លិប Juventus ចង់នាំយកមកចូលក្រុម ខណៈអនាគតរបស់គេអាចមានភាពមិនច្បាស់ ប្រសិនបើ Real Madrid ទិញបាន Kylian Mbappe ពី Paris Saint-Germain។
ទោះជាយ៉ាងណា Hazard នៅតែចង់លេងឱ្យ Real Madrid ប៉ុន្ដែគេក៏ចង់លេងឱ្យបានទៀងទាត់ផងដែរ និងមានអារម្មណ៍ថាខ្លួនឯងជាកីឡាករសំខាន់មួយរូប ប៉ុន្ដែរឿងទាំងនេះមិនអាចធានាបានទេ បើសិន Mbappe ចូលរួមជាមួយ Real Madrid។
Juventus កំពុងសម្លឹងមើលវិធី ក្នុងការចុះហត្ថលេខាយក Hazard ក្រោមលក្ខខណ្ឌខ្ចីជើង ប៉ុន្ដែក៏ត្រូវរង់ចាំការសម្រេចចិត្តរបស់កីឡាករវ័យ ៣០ឆ្នាំរូបនេះ និងក្លិបអធិរាជសផងដែរ៕
