កីឡាករខ្សែបម្រើសញ្ជាតិបារាំង Enzo Zidane ដែលត្រូវជាកូនប្រុសច្បងរបស់លោក Zinedine Zidane នោះមកដល់ពេលនេះត្រូវបានគេដឹងថា ទំនងជានឹងត្រូវបន្តធ្វើការអភិវឌ្ឍថែមទៀត ហើយជាមួយនឹងក្លឹបយក្សមួយនៅអាហ្វ្រិក។
យោងតាមការបញ្ជាក់របស់ភ្នាក់ងារកីឡាករគឺលោក Roberto Carlos បានអះអាងថា Enzo គឺនឹងត្រៀមខ្លួន ដើម្បីធ្វើដំណើរទៅចូលរួមជាមួយនឹងក្លឹប Wydad Casablanca ដែលកំពុងលេងនៅលីគអាជីព Botola Pro 1 ។ កីឡាករវ័យ២៥ឆ្នាំរូបនេះ ធ្លាប់មានបទពិសោធលេងជាមួយនឹងក្លឹបជាច្រើនដូចជា Juventus, Liceo Frances, San Jose ជាដើម មុនពេលដែលបានចូលរួមជាមួយនឹងឈុតយុវជនរបស់ Real Madrid កាលពីឆ្នាំ២០០៤ និងបានចំណាយពេល ១០ឆ្នាំនៅទីនោះ។
កីឡាកររូបនេះបន្ទាប់មកក៏អាចលេងនៅឈុត C និងឈុត B របស់ក្លឹប Real Madrid និងធ្លាប់បានបង្ហាញខ្លួនជាលើកដំបូង ឲ្យឈុតធំកាលពីឆ្នាំ២០១៦ ក្នុងការប្រកួតពានរង្វាន់ Copa del Rey ប៉ះនឹងក្រុម Cultural Leonesa៕
ប្រែសម្រួល៖ Lee
