ភ្នំពេញ៖ ឆ្នាំខ្មែរ ជាឆ្នាំដែលបានបែងចែកតាមរយៈច័ន្ទគតិ ដែលទាំងអស់គឺមានឆ្នាំចំនួន ១២ ជូត ឆ្លូវ ខាល ថោះ រោង ម្សាញ់ មមី វក រកា ច កុរ ដោយក្នុងនោះឆ្នាំនីមួយៗ គឺមានធាតុ និងពង្សទេវតាផ្សេងៗពីគ្នា។ ខាងក្រោមនេះ ជាធាតុ និងពង្សទេវតារបស់ឆ្នាំទាំង ១២៖
១. ឆ្នាំជូត ធាតុទឹក ពង្សទេវតាប្រុស
– ជាមនុស្សមានចិត្តរឹងម៉ាំ, ប្រាជ្ញាឈ្លាសវៃ, មានចិត្តក្លាហាន ពុះពៀរគ្រប់ឧបសគ្គ, ចូលចិត្ត ឈឺឆ្អាលចេះដឹងរឿងអ្នកដទៃ, មានមិត្តភក្កិស្រលាញ់រាប់អានច្រើន ចេះបត់បែបតាមកាលទេសៈ
២. ឆ្នាំឆ្លូវ ធាតុដី ពង្សមនុស្សប្រុស
- ជាមនុស្សមានចិត្តក្លាហាន, មានគំនិតសន្សំសំចៃ, មានវោហាពិរោះ, មានចិត្តស្រលាញ់បងប្អូន និងចូលចិត្តដើរលេងផ្លូវឆ្ងាយ
៣. ឆ្នាំខាល ធាតុឈើ ពង្សយក្សស្រី
- ជាមនុស្សស្មោះត្រង់ និង រហ័សរហួន រឹងប៉ឹង, មិនសូវចូលចិត្តនិយាយច្រើន, មនុស្សមានគេច្រណែនច្រើន មានចិត្តឆេវឆាវបន្តិច និងមិនចូលចិត្តដើរលេងផ្លូវឆ្ងាយ
៤. ឆ្នាំថោះ ធាតុឈើ ពង្សមនុស្សស្រី
- ជាមនុស្សមានសន្ដានចិត្តស្មោះត្រង់, ជាមនុស្សសម្បូរស្នេហ៍, ទន់ភ្លន់ និង សុភាពរាបសារ, សម្បូរមនុស្សស្រលាញ់ និងជូយយកអាសារ, មានសេចក្តីអត់ធន់នឹងការលំបាក និងមានចរិករឹងរូសបន្តិច
៥. ឆ្នាំរោង ធាតុមាស ពង្សទេវតាប្រុស
- ជាមនុស្សមានប្រាជ្ញាឈ្លាសវៃ, មានគេគោរពស្រលាញ់, មនុស្សមានមនោសញ្ចេតនាខ្ពស់, មានមហិច្ចតាធំ, យកចិត្តទុកដាក់លើអ្នកជុំវិញខ្លួន និងចូលចិត្តឈឺឆ្អាលរឿងអ្នកដ៏ទៃ
៦. ឆ្នាំម្សាញ់ ធាតុភ្លើង ពង្សមនុស្សប្រុស
- ជាមនុស្សមានភាពវៃឆ្លាត, ពូកែជួយយកអាសារគេ, ពូកែស្រមើស្រមៃច្រើន, មិនសូវរាប់អានអ្នកដទៃ ជាពិសេសមនុស្សថ្មី, មិនចូលចិត្តនិយាយច្រើន និងពូកែលេងសើចច្រើន
៧. ឆ្នាំមមី ធាតុភ្លើង ពង្សទេវតាស្រី
– ជាមនុស្សមានម្ចាស់ការលើខ្លួនឯង, ចូលចិត្តនិយាយទៀងត្រង់, ពូកែអត់ធ្មត់នឹងការងារ, ចូលចិត្តគិតអ្វីដែលល្អៗ និងមានអ្នកស្រលាញ់រាប់អានច្រើន
៨. ឆ្នាំមមែ ធាតុមាស ពង្សទេវតាស្រី
- ជាមនុស្សមានចិត្តក្លាហាន, មានចរិកស្លូតបូតសុភាពរាបសារ, មានចិត្តឧស្សាហ៍ព្យាយាម, ទៅទីណាក៏មានគេស្រលាញ់ចូលចិត្តច្រើន, ពូកែជួយយកអាសារអ្នកដទៃ និងជាមនុស្សសម្បូរញាតិ
៩. ឆ្នាំវក ធាតុដែក ពង្សយក្សប្រុស
– ជាមនុស្សពូកែវោហា, ចូលចិត្តញ៉េះញ៉ោះ លេងច្រើន, រហ័សរហួន រវៀសរវៃ, មានគំនិតឆ្នៃប្រឌិតខ្ពស់ និងទៅណាមកណាមានគេស្រលាញ់រាប់អានច្រើន
១០. ឆ្នាំរកា ធាតុដែក ពង្សយក្សប្រុស
– ជាមនុស្សស្មោះត្រង់, លឿនរហ័សរហួន, ក្លាហាន មានប្រាជ្ញាឈ្លាសវៃ, មិនសូវចេះអត់ធ្មត់, មានចិត្តកក់ក្តៅចំពោះមនុស្សជុំវិញខ្លួន និងមនុស្សឆ្លាត ឆាប់យល់កាលទេស
១១. ឆ្នាំច ធាតុដី ពង្សយក្សស្រី
- ជាមនុស្ស ឆ្លាត និង ស្មោះត្រង់, ចចេសរឹងរូស និង ពូកែឆាប់អន់ចិត្ត, មានទំនួលខុសត្រូវខ្ពស់ លើការងារ, មានគេស្រលាញ់និងជួយយកអាសារច្រើន និងមានមនោសញ្ចេតនាខ្ពស់
១២. ឆ្នាំកុរ ធាតុទឹក ពង្សមនុស្សស្រី
- ជាមនុស្សមានចរិកស្មោះត្រង់ និង ទន់ភ្លន់, មានចិត្តសន្តោសប្រណី, សុភាពរាបសារ គួរឲស្រលាញ់, មានគេស្រលាញ់ច្រើន និងជាមនុស្សកក់ក្តៅ និង ពូកែជួយយកអាសារអ្នកដទៃ៕
