«ក្រុងភ្នំពេញ» ៖ ក្រោយពីមានការចុះផ្សាយនៅលើគេហទំព័រ OBN Asia ជាមួយចំណងជើងថា «កូនកសិករព្រៃវែង ស្រលាញ់ប្រដាល់ពេក ចង់ទៃខ្សាច់ហាត់ម្នាក់ឯង» បានធ្វើឲ្យលោក សេន ប៊ុនថេន អតីតអ្នកប្រដាល់បានប្រកាសជួយជាបាវសាក់ដល់ក្មេងរូបនេះ ហើយនៅមានស្ត្រីម្នាក់ និងសប្បុរសជនជាច្រើនបានព្យាយាមសួរពីលេខ និង អសយដ្ឋានដើម្បីទំនាក់ទំនងជួយផ្គត់ផ្គង់ ខណៈដែលសាមីខ្លួន ក៏បានលើកឡើងថា បើមិនបានឡើងសង្វៀននឹងជក់គ្រឿងញៀន ។
បើតាមប្រភពព័ត៌មានចុងក្រោយ ដែលជាអ្នកភូមិកៀកផ្ទះភន់ ផែន នឹងជាប្រភពច្បាស់ការបានប្រាប់ OBN Asia ថា បច្ចុប្បន្ននេះកុមារា ភន់ ផែន អាយុ ១០ឆ្នាំនេះ កំពុងតែរំអុកដល់ឪពុកម្តាយរបស់គាត់ដើម្បីឡើងមកហាត់នៅរាជធានីភ្នំពេញ ធ្វើយ៉ាងណាឲ្យបានឡើងសង្វៀន ស្របពេលមួយថ្ងៃៗ នៅមិនសុខទាត់ទៃខ្សាច់ ដើមចេក ហើយគីឡូប៉ុនគាត់ គឺវៃរាប ក្នុងភូមិបឹង ឃុំច្រេស ស្រុកមេសាង ខេត្តព្រៃវែង ។
ដោយឡែកលោក ម៉ុល នី ដែលជាអ្នកស្រលាញ់និងលើកស្ទួយគុនខ្មែររូបនេះ បានប្រាប់មកកាន់អង្គភាពយើងខ្ញុំផងដែរថា ភន់ ផែន កំពុងនៅមិនសុខ ដោយចង់ឡើងសង្វៀនណាស់ ហើយថែមទាំងបោះសម្តីទៅកាន់ឪពុកម្តាយរបស់គាត់ថា បើសិនជាមិនបានវៃ ច្បាស់ណាស់ គាត់នឹងធ្វើរឿងដែលសង្គមស្អប់ខ្ពើម ជាពិសេសជក់គ្រឿងញៀនតែម្តង ។
លោកបានបន្តថា អ្វីដែលរាំងស្ទះសម្រាប់គោលបំណងភន់ ផែន គឺដោយសារតែឪពុកម្តាយរបស់គាត់ខ្លាចកូនឈឺ មានបញ្ហាលើសង្វៀន ទើបមិនដាច់ចិត្ត ។
ទោះបីជាយ៉ាងនេះក្តី បច្ចុប្បន្ននេះឃើញថាមានក្លិបជាច្រើនសុទ្ធតែជាក្លិបល្បីៗ នៅសង្វៀនប្រដាល់រាជធានីភ្នំពេញ មិនក្រោម ៣ក្លិបនោះទេ ដែលចង់ បានកុមារា ភន់ ផែន យកមកបង្ហាត់បង្រៀនវិជ្ជាគុនប្រដាល់គុនខ្មែរ ដើម្បីចូលរួមលើកស្ទួយប្រដាល់គុនខ្មែរ ហើយក៏ចង់សម្រេចបំណង ប្រាថ្នារបស់កុមារារូបនេះផងដែរ៕
