«ក្រុងភ្នំពេញ» ៖ ដោយសារតែនិស្ស័យស្រលាញ់ នឹងចង់ប្រែក្លាយខ្លួនជាអ្នកប្រដាល់អាជីពខ្លាំងក្លា កុមារាម្នាក់ជាកូនអ្នកកសិករជាយខេត្តព្រៃវែង បានព្យាយាមចងបាវខ្សាច់ហាត់ទាត់វៃម្នាក់ឯង ក្នុងគោលបំណងក្លាយជាអ្នកប្រដាល់អាជីពនៅថ្ងៃខាងមុខ។
បើតាមលោក ម៉ុល នី អ្នកស្នេហាវិស័យប្រដាល់គុនខ្មែរ នឹងជាអ្នកបំផុសគំនិតឲ្យចូលរួមគាំទ្រលើវិស័យប្រដាល់ លោកបានបញ្ជាក់ប្រាប់ OBN Asia ថា កុមារាម្នាក់នេះអាយុ ១០ឆ្នាំ គាត់មានឈ្មោះ ភួន ផែន គេហៅគាត់ថាអាផែនៗ ជាកូនកសិករស្ថិតនៅភូមិបឹង ឃុំច្រេស ស្រុក មេសាង ខេត្តព្រៃវែង ។
លោកបានបន្តថា បើតាមសម្តីកុមារាផែន បានប្រាប់លោកអំឡុងលោកទៅលេងនៅស្រុក ហើយគាត់(កុមារាផែន) បានប្រាប់ថា គាត់ចង់ក្លាយជាអ្នកប្រដាល់ម្នាក់ក្នុងពេលអនាគត ដោយសុបិនចង់ឡើងសង្វៀនប្រដាល់ដូចគេដូចឯង ជាពិសេសមានឆន្ទះចង់ក្លាយជាជើងខ្លាំងម្នាក់ ប្រកួតលើឆាកអន្តរជាតិ។
លោក ម៉ុល នី បានបន្តថាលោកពិតជាកោតសរសើរដល់កុមារាម្នាក់នេះ ដែលមានឆន្ទះខ្ពស់ដោយព្យាយាមទាត់ទៃដាក់ខ្សាច់តែម្នាក់ឯង ជារៀងរាល់ថ្ងៃ លោកថាគាត់មានឆន្ទះខ្ពស់បែបនេះគឺអាចនឹងសម្រេចនូវផែនការ ដែលជាក្តីប្រាថ្នាក្នុងពេលខាងមុខជាក់ជាមិនខាន ហើយសង្ឈឹមថានឹងមានក្លិបប្រដាល់ល្អៗ ធ្វើការទាក់ទងគាត់មកលត់ដុំវិវត្តន៍ខ្លួនក្លាយជាកីឡាករល្អវ័យក្មេងផងដែរ ។
អ្នកគាំទ្រនិងស្នេហាវិស័យប្រដាល់រូបនេះបានបន្តថា សម្រាប់ឪពុកម្តាយ ដែលមានកូនៗល្អដូច ភួន ផែន នេះគួរតែលើកទឹកចិត្តបណ្តុះគំនិត បន្ថែមជូនកូន ឲ្យសម្រេចក្តីប្រាថ្នារបស់គាត់ បើស្រលាញ់គាត់ត្រូវឲ្យគាត់ធ្វើនូវអ្វីដែលជាបំណងប្រាថ្នារបស់គាត់ ដើម្បីឲ្យប្រដាល់គុនខ្មែរ កាន់តែរីកលូតលាស់ទៅមុខ លើកទាំងមុខមាត់សង្គមជាតិ និងក្រុមគ្រួសារ៕
លោក ម៉ុល នី
