កំពូលអ្នកប្រដាល់មាឌល្អិតស្បែកខ្មៅរបស់អាមេរិច Floyd Mayweather ថ្មីៗនេះបានលើកឡើងថា Manny Pacquiao ជាគូប្រកួតដែលពិបាកយកឈ្នះបំផុត ក្នុងអាជីលើសង្វៀន២១ឆ្នាំកន្លងមកនេះ។ អ្នកទាំង២ ត្រូវបានចាត់ទុកជាជើងខ្លាំងគ្មានគូប្រៀប ក្នុងប្រវត្តិសាស្ត្រប្រដាល់សកល នឹងស្ថិតនៅចំណុចកំពូលក្នុងសម័យកាលតែមួយ។
Mayweather និង Pacquiao បានប៉ះគ្នាក្នុងឆ្នាំ២០១៥ នាសង្វៀន MGM Grand Garden Arena បន្ទាប់ពីចរចារគ្នាអស់រយៈពេល៦ឆ្នាំ។
Floyd បន្តកំណត់ត្រាមិនដែលចាញ់របស់ខ្លួន ដោយយកឈ្នះពិន្ទុឯកឆន្ទលើ Pacquiao។ ការប្រកួតនេះ ទាក់ទាញការទិញទស្សនា pay-per-view ច្រើនបំផុតក្នុងប្រវត្តិសាស្ត្រប្រដាល់។
តាំងពីនោះមក ទាំង Floyd និង Pacquiao បន្តឡើងសង្វៀនតទល់ជើងខ្លាំងជាច្រើន រួមមាន Andre Berto, Keith Thurman, Adrien Broner។ល។ លើសពីនេះ អ្នកទាំង២ក៏កាន់កំណត់ត្រាឈ្នះលើ Oscar De La Hoya, Miguel Cotto, Ricky Hatton, Juan Manuel Marquez និង Shane Mosley ដូចគ្នា។
ទោះកាន់កំណត់ត្រាល្អឥតខ្ចោះ៥០ប្រកួតមិនដែលចាញ់ Floyd Mayweather ក្នុងវ័យ៤៤ឆ្នាំ នៅតែសរសើរពីសមត្ថភាព Pacquiao មិនដាច់ពីមាត់ ដោយលើកឡើងថា វីរៈបុរសហ្វីលីពីនរូបនេះ ជាគូប្រកួតខ្លាំងបំផុត ដែលខ្លួនធ្លាប់ជួប។
ឆ្លើយឆ្លង និងតារារ៉េប Gillie Da King ក្នុងកម្មវិធី Million Dollaz Worth of Game បុរសដែលរកចំណូលច្រើនជាង១០០០លានដុល្លារពីប្រដាល់និយាយថា Pacquiao ស័ក្តិសមជាសមាជិកនៃ Hall of Fame ក្នុងពិភពប្រដាល់៕
សូមទស្សនាវីដេអូខាងក្រោម៖
https://www.youtube.com/watch?v=a_TGg4LdoMI
