យោធាអ៊ីស្រាអែល បាននិយាយនៅថ្ងៃអង្គារនេះថា កងកំលាំងរបស់ខ្លួនម្នាក់ត្រូវបានសម្លាប់ អំឡុងពេលការវាយឆ្មក់ នៅឯតំបន់ West Bank ដោយការគប់ដុំថ្មមកលើរូបគាត់។ ឧប្បត្តិហេតុនេះ បានកើតឡើងនៅក្នុងទីប្រជុំជន Ya’bad ភាគខាងលិចនៃទីក្រុង Jenin នៅភាគខាងជើងតំបន់ West Bank។
អ្នកនាំពាក្យយោធាអ៊ីស្រាអែលម្នាក់ បានចេញសេចក្តីថ្លែងការណ៍មួយ ដោយនិយាយថាទាហានត្រូវបានសម្លាប់ ដោយដុំថ្មគប់ទៅលើក្បាលរបស់គាត់ ក្នុងកំឡុងពេលសកម្មភាពប្រតិបត្តិការនៅក្នុងទីក្រុង។
អំពើហឹង្សានេះបានកើតឡើងចំពេលដែលមានភាពតានតឹង កាន់តែខ្លាំងរវាងអ៊ីស្រាអែល និងប៉ាឡេស្ទីន ក្នុងតំបន់ West Bank៕
