នៅថ្ងៃពុធនេះ(22 មេសា) ប្រទេសថៃបានរកឃើញអ្នកវិជ្ជមានកូវីដ១៩ ចំនួន ១៥ករណីបន្ថែមទៀត ព្រមទាំងមានអ្នកស្លាប់ចំនួន ១នាក់ផងដែរ យោងតាមតួលេខនេះបានឲ្យដឹងថា ចំនួនអ្នកឆ្លងវីរុសផ្លូវដង្ហើមនេះមានការថយចុះ។ បើទោះបីជាមានការថយចុះ នៃករណីឆ្លងថ្មីក៏ដោយ ក៏មន្រ្តីសុខាភិបាល ព្រមានឲ្យពលរដ្ឋទាំងអស់បន្តការប្រងប្រយ័ត្នបន្ថែមទៀត។
លោក Taweesin Wisanuyothin អ្នកនាំពាក្យមជ្ឈមណ្ឌលប្រយុទ្ធប្រឆាំងជំងឺឆ្លង របស់ប្រទេសថៃ បាននិយាយថា «ចំនួនអ្នកឆ្លងថ្មីមានការថយចុះក៏ពិតមែន តែវាគ្រាន់ជាជោគជ័យតូចមួយប៉ុន្នោះ ប៉ុន្តែយើងមិនបន្ថយការការពានោះទេ»។ លោកបានបន្តទៀតថា អ្នកស្លាប់នៅថ្ងៃពុធនេះ គឺស្ត្រីជនជាតិថៃ អាយុ ៥៨ឆ្នាំ ដែលមានជំងឺទឹកនោមផ្អែម និងរោគលើសឈាម។
គួររំលឹកឡើងវិញផងដែរថា នៅក្នុងប្រទេសថៃមានករណីឆ្លងសរុបចំនួន ២,៨២៦ករណី និងអ្នកស្លាប់សរុបមានចំនួន ៤៩នាក់៕
