បរទេស៖ ប្រធានគណៈកម្មការអឺរ៉ុប លោកស្រី យូស៊ូឡា វ៉ុន ដឺ ឡេយេន (Ursula von der Leyen) បាននិយាយថា សហភាពអឺរ៉ុប (EU) បានរៀបចំសម្រាប់ការចរចាដ៏តឹងតែងជាមួយសហរដ្ឋអាមេរិក ដើម្បីការពារផលប្រយោជន៍សេដ្ឋកិច្ចរបស់ខ្លួន។ ការលើកឡើងរបស់លោកស្រីបានធ្វើឡើង បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានប្រកាសពីគម្រោងដំឡើងពន្ធលើការនាំចូលពីសហភាពអឺរ៉ុប។
ថ្លែងអំពីទំនាក់ទំនងពាណិជ្ជកម្មឆ្លងដែនអាត្លង់ទិក លោក វ៉ុន ដឺ ឡេយេន បានគូសបញ្ជាក់អំពីទំនាក់ទំនងសេដ្ឋកិច្ចដ៏ស៊ីជម្រៅរវាងភាគីទាំងពីរ ដោយលោកស្រីកត់សម្គាល់ថា ការងាររាប់លានអាស្រ័យលើភាពជាដៃគូ។
លោកស្រីបានប្រាប់សន្និសីទឯកអគ្គរដ្ឋទូតសហភាពអឺរ៉ុបថា «ក្រុមហ៊ុនអឺរ៉ុបនៅសហរដ្ឋអាមេរិកផ្តល់ការងារដល់ជនជាតិអាមេរិកចំនួន ៣,៥លាននាក់ ហើយការងារនៅសហរដ្ឋអាមេរិករាប់លានផ្សេងទៀតពឹងផ្អែកដោយផ្ទាល់លើពាណិជ្ជកម្មជាមួយសហភាពអឺរ៉ុប។ ទំហំពាណិជ្ជកម្មទាំងមូលរវាងពួកយើងគឺ ១,៥ប៊ីលានដុល្លារអាម៉េរិក»។ លោកស្រីបានសង្កត់ធ្ងន់ថា ភាគីទាំងពីរមានបញ្ហាច្រើន។
លោកស្រីបាននិយាយថា «មានការងារ អាជីវកម្ម និងឧស្សាហកម្មនៅទីនេះ និងនៅក្នុងសហរដ្ឋអាមេរិក ដែលពឹងផ្អែកលើភាពជាដៃគូឆ្លងដែនអាត្លង់ទិក។ ដូច្នេះយើងចង់ធ្វើឱ្យវាដំណើរការ»។
លោកស្រីបានរំលឹកឡើងវិញថា សហភាពអឺរ៉ុបនៅតែបើកចំហ និងមានភាពជាក់ស្តែងក្នុងការសម្រេចបាននូវគោលបំណងរបស់ខ្លួន ប៉ុន្តែត្រូវការពារយ៉ាងម៉ឺងម៉ាត់ចំពោះផលប្រយោជន៍សេដ្ឋកិច្ចរបស់ខ្លួន។
លោកស្រីបាននិយាយថា «យើងនឹងការពារផលប្រយោជន៍ផ្ទាល់ខ្លួនរបស់យើងជានិច្ច ទោះបីជាយ៉ាងណាក៏ដោយ និងនៅពេលណាដែលចាំបាច់។ នេះគឺជាវិធីរបស់សហភាពអឺរ៉ុប»៕
