បរទេស៖ ក្រសួងការបរទេសឥណ្ឌា (MEA) បាននិយាយកាលពីថ្ងៃចន្ទថា នាយករដ្ឋមន្រ្តីឥណ្ឌា លោក ណារេនដ្រា ម៉ូឌី (Narendra Modi) នឹងទៅបំពេញទស្សនកិច្ចនៅប្រទេសអ៊ុយក្រែននៅថ្ងៃទី២៣ ខែសីហាខាងមុខនេះ តាមការអញ្ជើញរបស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy)។
នេះនឹងជាលើកដំបូងរបស់នាយករដ្ឋមន្ត្រីឥណ្ឌាទៅកាន់ប្រទេសដែលកំពុងរងគ្រោះដោយសារសង្រ្គាមមួយនេះ ចាប់តាំងពីប្រទេសទាំងពីរ បានបង្កើតទំនាក់ទំនងការទូតប្រហែលជាង ៣០ឆ្នាំមុន។
ដោយបញ្ជាក់ឡើងវិញនូវគោលជំហររបស់ឥណ្ឌាចំពោះជម្លោះរុស្ស៊ី-អ៊ុយក្រែន ដែលបានចាប់ផ្តើមកាលពីថ្ងៃទី២៤ ខែកុម្ភៈ ឆ្នាំ២០២២ មកនោះ ក្រសួង MEA បាននិយាយថា មានតែការសន្ទនា និងការទូតប៉ុណ្ណោះដែលអាចនាំទៅរកដំណោះស្រាយយូរអង្វែងនៃជម្លោះនេះ។
លោកបាននិយាយបន្ថែមថា «នេះក៏ជាការកត់សម្គាល់ និងជាដំណើរទស្សនកិច្ចជាប្រវត្តិសាស្ត្រផងដែរ ដែលនេះជាលើកទីមួយដែលនាយករដ្ឋមន្ត្រីឥណ្ឌានឹងទៅបំពេញទស្សនកិច្ចនៅអ៊ុយក្រែនក្នុងរយៈពេលជាង ៣០ឆ្នាំកន្លងមកនេះចាប់តាំងពីយើងបានបង្កើតទំនាក់ទំនងការទូតទ្វេភាគី។ ដំណើរទស្សនកិច្ចនេះនឹងពង្រឹងទៅលើទំនាក់ទំនងកម្រិតខ្ពស់នាពេលថ្មីៗនេះរវាងមេដឹកនាំទាំងពីរ»៕
