បរទេស៖ ប្រភពវេជ្ជសាស្ត្រ និងសន្តិសុខប៉ាឡេស្ទីនបាននិយាយថា យ៉ាងហោចណាស់ជនជាតិប៉ាឡេស្ទីន ១០០នាក់ត្រូវបានសម្លាប់ ដោយការវាយប្រហារតាមអាកាសរបស់អ៊ីស្រាអែលនៅឯសាលារៀនមួយដែលជាជម្រកសម្រាប់ជនភៀសខ្លួននៅក្នុងសង្កាត់ Al-Daraj ក្នុងទីក្រុងហ្គាហ្សា។
ពួកគេបានប្រាប់សារព័ត៌មានស៊ីនហួថា ជនរងគ្រោះដែលស្លាប់រួមមានស្ត្រី និងកុមារ ហើយត្រូវបានបញ្ជូនទៅកាន់មន្ទីរពេទ្យ Al-Ahli ក្នុងទីក្រុងហ្គាហ្សា។
យន្តហោះចម្បាំងរបស់អ៊ីស្រាអែលបានកំណត់គោលដៅទៅលើសាលារៀន Al-Tabi’in ក្នុងសង្កាត់សង្កាត់ Al-Daraj កណ្តាលទីក្រុងហ្គាហ្សា ខណៈពេលដែលជនភៀសខ្លួននៅក្នុងសាលារៀនកំពុងធ្វើពិធីបួងសួង Fajr ។
សាក្សីក្នុងតំបន់បានប្រាប់សារព័ត៌មានស៊ីនហួថា ដោយសារកង្វះរថយន្តសង្គ្រោះ និងឧបករណ៍ការពារស៊ីវិលនៅក្នុងទីក្រុង ជនរងគ្រោះត្រូវបានបញ្ចូនទៅកាន់មន្ទីរពេទ្យតាមរយៈ រថយន្តឯកជន និងរទេះអូសដោយសត្វ។
ការិយាល័យប្រព័ន្ធផ្សព្វផ្សាយរបស់រដ្ឋាភិបាលដែលគ្រប់គ្រងដោយក្រុមហាម៉ាស់នៅតំបន់ហ្គាហ្សាបាននិយាយនៅក្នុងសេចក្តីថ្លែងការណ៍មួយថា កងទ័ពអ៊ីស្រាអែល «បានទម្លាក់គ្រាប់បែកដោយផ្ទាល់ទៅលើជនភៀសខ្លួន ខណៈពេលដែលពួកគេកំពុងធ្វើពិធីបួងសួង Fajr ហើយនេះគឺជាអ្វីដែលបានបង្កើនចំនួនអ្នកស្លាប់យ៉ាងឆាប់រហ័ស»។
ការិយាល័យបាននិយាយថា «ការទម្លាក់គ្រាប់បែករបស់អ៊ីស្រាអែលទៅលើសាលារៀនរបស់ជនភៀសខ្លួនកើតឡើងក្នុងឧក្រិដ្ឋកម្មប្រល័យពូជសាសន៍ និងការបោសសម្អាតជនជាតិភាគតិចប្រឆាំងនឹងប្រជាជនប៉ាឡេស្ទីនរបស់យើងក្នុងលក្ខណៈច្បាស់លាស់»៕
