បរទេស៖ នគរបាលប្រទេសវៀតណាមបានចាប់ខ្លួនអតីតអនុរដ្ឋមន្ត្រីក្រសួងបរិស្ថាន និងមន្ត្រីជាន់ខ្ពស់ ០៤នាក់ផ្សេងទៀត ដែលត្រូវបានចោទប្រកាន់ពីបទរំលោភលើបទប្បញ្ញត្តិនៃការជីកយករ៉ែ បន្ទាប់ពីមានការស៊ើបអង្កេតយ៉ាងទូលំទូលាយលើការប្រព្រឹត្តខុសរបស់ក្រុមហ៊ុនជីករ៉ែកម្រ នៅភាគខាងជើងប្រទេសវៀតណាម។
នៅក្នុងសេចក្តីថ្លែងការណ៍០១ ក្រសួងសន្តិសុខសាធារណៈដែលគ្រប់គ្រងដោយនគរបាលបាននិយាយថា លោក Nguyen Linh Ngoc ដែលជាអនុរដ្ឋមន្ត្រីក្រសួងធនធានធម្មជាតិ និងបរិស្ថានក្នុងឆ្នាំ២០១០ ដល់២០១៨ ត្រូវបានចោទប្រកាន់ពីបទ “បំពានដោយចេតនានៃបទប្បញ្ញត្តិគ្រប់គ្រងសេដ្ឋកិច្ចរបស់រដ្ឋ បង្កឲ្យមានផលវិបាកយ៉ាងធ្ងន់ធ្ងរ”។
ក្រសួងបាននិយាយថា អតីតមន្ត្រីជាន់ខ្ពស់ផ្សេងទៀតនៃនាយកដ្ឋានរុករករ៉ែរបស់ក្រសួងត្រូវបានចាប់ខ្លួនក្រោមការចោទប្រកាន់ដូចគ្នានេះ ប៉ុន្តែមិនបានផ្តល់ព័ត៌មានលម្អិតបន្ថែមទេ។
មន្ត្រីដែលត្រូវចាប់ខ្លួនទាំងនោះមិនអាចធ្វើអត្ថាធិប្បាយបាន ហើយការហៅតាមទូរសព្ទទៅក្រសួងបរិស្ថានក៏គ្មានអ្នកតបដែរ។
កាលពីឆ្នាំមុន នគរបាលបានចាប់ខ្លួនមន្ត្រីជាន់ខ្ពស់ជាច្រើននាក់ រួមទាំងប្រធានក្រុមហ៊ុន Thai Duong Group ដែលប្រតិបត្តិការអណ្តូងរ៉ែនៅខេត្ត Yen Bai ភាគខាងជើងប្រទេសវៀតណាម ពីបទក្លែងបន្លំបង្កាន់ដៃពន្ធលើការបន្ថែមតម្លៃក្នុងការជួញដូររ៉ែកម្រ៕
