បរទេស៖ ឧស្សាហកម្មសណ្តែកសៀងរបស់ប្រទេសម៉ាឡាវីបានឈានជើងចូលទីផ្សារចិន ខណៈដែលប្រទេសអាហ្វ្រិកខាងត្បូងស្វែងរកការបង្កើនការនាំចេញកសិកម្មដើម្បីជំរុញសេដ្ឋកិច្ច។
លោក ភូល វេងវេរ៉េ (Paul Kwengwere) នាយកប្រតិបត្តិនៃមជ្ឈមណ្ឌលវិនិយោគ និងពាណិជ្ជកម្មម៉ាឡាវី បានបញ្ជាក់ប្រាប់ប្រព័ន្ធផ្សព្វផ្សាយក្នុងស្រុកថា ការបញ្ជូនសាកល្បងទម្ងន់ ២៤០តោនដោយក្រុមហ៊ុន Paramount Holdings Limited ដែលជាក្រុមហ៊ុនក្នុងស្រុកត្រូវបាននាំចេញដោយជោគជ័យ និងអនុម័តដោយអាជ្ញាធរចិន។ លោកបានបន្តថា នេះជាការខិតខំប្រឹងប្រែងរបស់ភាគីពាក់ព័ន្ធជាច្រើនដែលរួមមាន ទីភ្នាក់ងាររដ្ឋាភិបាល សហគ្រាសឯកជន និងតំណាងភាគីចិន។
នាយកគ្រប់គ្រងក្រុមហ៊ុន Paramount Holdings Limited លោក ម៉ាហេស ហ្គេឌៀ (Mahesh Ghedhia) បានប្រាប់ប្រព័ន្ធផ្សព្វផ្សាយក្នុងស្រុកថា ក្រុមហ៊ុនរបស់លោកបានទទួលជោគជ័យចេញពីក្រុមហ៊ុនដែលឆ្លងកាត់ដំណើរការទទួលស្គាល់ដោយអាជ្ញាធរចិន ដើម្បីបញ្ជាក់ពីគុណភាពនៃផលិតផល មុនពេលត្រូវបានដឹកជញ្ជូនទៅកាន់ប្រទេសចិន។ លោកបន្តថា ការសាកល្បងជោគជ័យនឹងនាំឱ្យក្រុមហ៊ុនរបស់លោកនាំចេញសណ្តែកសៀងចំនួន ២០,០០០តោន។
លោក ហ្គេឌៀ ត្រូវបានដកស្រង់សម្តីថា «ការដឹកជញ្ជូននេះបើកទ្វារសម្រាប់អ្នកនាំចេញម៉ាឡាវី ហើយយើងគ្រោងនឹងបង្កើនបរិមាណរបស់យើងដោយសារទីផ្សារចិនកំពុងស្វែងរកសណ្តែកសៀង ១០០,០០០តោន។ យើងបានចុះហត្ថលេខាលើកិច្ចសន្យាចំនួន ២០,០០០តោន»។
រដ្ឋមន្ត្រីក្រសួងហិរញ្ញវត្ថុ និងសេដ្ឋកិច្ច លោក សូស្ទេន វេងវេ (Sosten Gwengwe) បានប្រាប់ប្រព័ន្ធផ្សព្វផ្សាយក្នុងស្រុកថា កិច្ចព្រមព្រៀងនាំចេញជាមួយប្រទេសចិន គឺជាកិច្ចព្រមព្រៀងរវាងរដ្ឋាភិបាល និងរដ្ឋាភិបាល ហើយរហូតមកដល់ពេលនេះ ពួកគេបានចុះហត្ថលេខាលើពិធីសារស្តីពីសណ្តែកសៀង គ្រាប់ម៉ាកាដាមៀ ផ្លែម្ទេសស្ងួត និងការចរចាកំពុងបន្តចុះហត្ថលេខាលើពិធីសារស្តីពីថ្នាំជក់ ដំណាំតែ និងត្រីលម្អ៕
ប្រភព៖ AKP
