បរទេស៖ យោងតាមប្រមុខរដ្ឋ លោក នុងធុមបាម ប៊ីរេន ស៊ីងហ៍ (N. Biren Singh) កាលពីថ្ងៃចន្ទបានឱ្យដឹងថា ស្ថាប័នអប់រំទាំងអស់ រួមទាំងសាលារៀន និងមហាវិទ្យាល័យនឹងនៅតែបិទនៅក្នុងទីក្រុងម៉ានីពួរ ភាគឦសាននៃប្រទេសឥណ្ឌា រហូតដល់ថ្ងៃអង្គារ ដោយសារតែអាកាសធាតុមិនល្អ មានភ្លៀងធ្លាក់ខ្លាំង និងផ្គររន្ទះ។
ភ្លៀងធ្លាក់ឥតឈប់ឈរត្រូវបានរាយការណ៍នៅក្នុងទីក្រុងក្នុងរយៈពេល ២ថ្ងៃកន្លងមកនេះ ដែលប៉ះពាល់ដល់ជីវភាពប្រចាំថ្ងៃក្នុងតំបន់។
លោក ស៊ីងហ៍ បានសរសេរនៅលើបណ្ដាញសង្គមអ៊ិច ដែលពីមុនជាបណ្ដាញសង្គមធ្វីតធ័រថា «សាលារៀន និងមហាវិទ្យាល័យទាំងអស់នឹងនៅតែបិទទ្វារនៅថ្ងៃទី៦ និងថ្ងៃទី៧ ខែឧសភា ឆ្នាំ២០២៤ ដោយសារស្ថានភាពអាកាសធាតុនៅក្នុងតំបន់។ ការសម្រេចចិត្តនេះត្រូវបានគេយកជាវិធានការប្រុងប្រយ័ត្នប្រឆាំងនឹងហានិភ័យដែលបង្កឡើងដោយលក្ខខណ្ឌអាកាសធាតុបច្ចុប្បន្ន»។
លោកបានមានប្រសាសន៍ថា «ខ្ញុំជំរុញឱ្យអ្នកទាំងអស់គ្នារក្សាព័ត៌មានថ្មីៗ និងរក្សាសុវត្ថិភាពនៅក្នុងផ្ទះ។ រដ្ឋាភិបាលរដ្ឋកំពុងចាត់វិធានការចាំបាច់ទាំងអស់ដើម្បីការពារអាយុជីវិត និងទ្រព្យសម្បត្តិ និងជួយដល់អ្នកដែលរងផលប៉ះពាល់»។
ទន្ទឹមនឹងនេះ តំបន់មួយចំនួននៃប្រទេសអាស៊ីខាងត្បូង ជាពិសេសនៅតំបន់ភាគខាងកើត ភាគខាងត្បូង និងកណ្តាល បានបន្តជួបប្រទះនូវស្ថានភាពរលកកម្ដៅ ជាមួយនឹងកម្រិតបារតឡើងដល់ ៤៥អង្សាសេ៕
ប្រភព៖ AKP
