ធនាគារកណ្តាលថៃ (BoT) បាននិយាយថា ខ្លួនបានធ្វើអន្តរាគមន៍ក្នុងទីផ្សាររូបិយប័ណ្ណ ដើម្បីបន្ធូរបន្ថយការផ្លាស់ប្តូរលើសលប់នៃប្រាក់បាតថៃ ដោយបាននិយាយបន្ថែមថា អត្រាគោលនយោបាយបច្ចុប្បន្នមានភាពរឹងមាំ និងអំណោយផលដល់ការងើបឡើងវិញនៃសេដ្ឋកិច្ច។
លោក ពីទិ ឌីស៊ីយ៉ាតាត់ (Piti Disyatat) ជំនួយការទេសាភិបាលធនាគារកណ្តាលថៃ បាននិយាយកាលពីពេលថ្មីៗនេះថា ទោះបីជាមានភាពប្រែប្រួលខ្ពស់ក៏ដោយ ក៏វាមិនខុសពីធម្មតាទេ ហើយប្រាក់បាតថៃកំពុងផ្លាស់ប្តូរស្របតាមរូបិយប័ណ្ណក្នុងតំបន់។ ប្រាក់បាតថៃត្រូវបានជួញដូរនៅជុំវិញតម្លៃ ៣៨,៩បាតក្នុងមួយដុល្លារអាម៉េរិកនៅក្នុងទីផ្សារក្រៅប្រទេសនៅរសៀលថ្ងៃទី២៤ ខែមេសា បន្ទាប់ពីបានធ្លាក់ចុះលើសពីតម្លៃជាង ៣៧បាតថៃក្នុងមួយដុល្លារអាម៉េរិកកាលពីថ្ងៃទី២២ និង ២៣ ខែមេសា។
ធនាគារកណ្តាលបាននិយាយថា អត្រាការប្រាក់គោលនយោបាយបច្ចុប្បន្នមានភាពរឹងមាំ ហើយអាចដោះស្រាយហានិភ័យនាពេលអនាគតចំពោះសេដ្ឋកិច្ច ចំពេលមានសម្ពាធបន្តពីរដ្ឋាភិបាលក្នុងការកាត់បន្ថយការចំណាយលើការខ្ចីប្រាក់ និងជួយចាប់ផ្តើមកំណើនយឺត។
លោក ពីទិ បាននិយាយថា «អត្រាគោលនយោបាយបច្ចុប្បន្ន គឺនៅជិតភាពអព្យាក្រឹត» ដោយលោកបាននិយាយបន្ថែមថា ធនាគារកណ្តាលបានត្រៀមខ្លួនរួចជាស្រេចដើម្បីកែតម្រូវវាប្រសិនបើមានការចាំបាច់៕
ប្រភព៖ AKP
