បរទេស៖ គណៈរដ្ឋមន្ត្រីថ្មីរបស់នាយករដ្ឋមន្ត្រីថៃ លោក ស្រេតថា ថាវីស៊ីន ត្រូវបានប្រកាសកាលពីថ្ងៃទី២៨ ខែមេសា។
បញ្ជីនៃការរុះរើគណៈរដ្ឋមន្រ្តីថ្មីនេះ ត្រូវបានចុះហត្ថលេខាដោយព្រអង្គម្ចាស់ព្រះបាទរាមាទី១០ និងចុះហត្ថលេខាដោយនាយករដ្ឋមន្ត្រីថៃ លោក ស្រេតថា ថាវីស៊ីន មុនពេលវាត្រូវបានចេញផ្សាយ។
នៅក្នុងគណៈរដ្ឋមន្ត្រីថ្មីនោះ លោក ស្រេតថា បានដកខ្លួនចេញពីការទទួលខុសត្រូវជារដ្ឋមន្ត្រីក្រសួងហិរញ្ញវត្ថុ ដោយតែងតាំងលោក ពីឆៃ ជុនហាវ៉ាជីរ៉ា (Pichai Chunhavajia) អតីតប្រធានក្រុមប្រឹក្សាភិបាលនៃផ្សារហ៊ុនថៃជំនួសវិញ។ លោក ពីឆៃ ក៏ឡើងឋានៈជាឧបនាយករដ្ឋមន្ត្រីក្នុងពេលនោះផងដែរ។
លោក ស៊ុមសាក់ ថេបស៊ូទីន (Somsak Thepsutin) ត្រូវបានតែងតាំងជារដ្ឋមន្ត្រីក្រសួងសុខភាពសាធារណៈ ជំនួសលោក ចុលណាន ស្រ៊ីកែវ (Cholnan Srikaew)។
លក ប៉ានព្រី បាហ៊ីដដា-នូការ៉ា (Parnpree Bahiddha-Nukara) រក្សាតំណែងជារដ្ឋមន្ត្រីការបរទេសដដែល ប៉ុន្តែលោកលែងជាឧបនាយករដ្ឋមន្ត្រីហើយ។
ក្នុងពេលជាមួយគ្នានេះដែរ រដ្ឋមន្ត្រីក្រសួងដឹកជញ្ជូន លោក ស៊ូរីយ៉ា ជួងរូងរឿងគីត (Suriya Juangroongruangkit) ត្រូវបានប្រគល់ភារកិច្ចបន្ថែមជាឧបនាយករដ្ឋមន្ត្រី។
រដ្ឋមន្ត្រីក្រសួងទេសចរណ៍ និងកីឡា លោកស្រី ស៊ូដាវ៉ាន់ វ៉ាងស៊ូផាគីចកុសល (Sudawan Wangsuphakijkosol) ត្រូវបានផ្ទេរទៅធ្វើជារដ្ឋមន្ត្រីក្រសួងវប្បធម៌ ដោយប្តូរឱ្យលោក សឺមសាក់ ពង្សប៉ានីត (Sermsak Pongpanit) ជំនួសវិញ។
ទន្ទឹមនឹងនេះដែរ លោក ពីជីត ជើនបាន (Pichit Chuenban) កាន់តំណែងជារដ្ឋមន្ត្រីទីស្តីការនាយករដ្ឋមន្រ្តី។
នេះជាការរុះរើគណៈរដ្ឋមន្ត្រីជាលើកដំបូងរបស់លោក ស្រេតថា ក្នុងរយៈពេល ៨ខែបន្ទាប់ពីលោកចូលកាន់តំណែងជានាយករដ្ឋមន្រ្តីថៃ៕
ប្រភព៖ AKP
