ភ្នំពេញ៖ «គិតត្រឹមខែមីនា ឆ្នាំ២០២៤ មានយុវជនចំនួន ៣៤ ២៦៧នាក់ (ស្រី ៩ ៦០៦នាក់) កំពុងទទួលបានការបណ្ដុះបណ្ដាល ក្នុងនោះ ចំនួន ១៦ ២៦៧នាក់ (ស្រី ៥ ២២៣នាក់) កំពុងទទួលការបណ្តុះបណ្តាលសញ្ញាបត្របច្ចេកទេសវិជ្ជាជីវៈ កម្រិត១ (CI)។ នេះបើតាម សារលិខិត របស់សម្តេចមហាបវរធិបតី ហ៊ុនម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាក្នុងឱកាសខួបអនុស្សាវរីយ៍លើកទី១៣៨ នៃទិវាពលកម្មអន្ដរជាតិថ្ងៃទី១ ខែឧសភា ឆ្នាំ២០២៤។
ក្នុងសារលិខិត ដដែល សម្ដេចធិបតីនាយករដ្ឋមន្ត្រី បានបន្តអំពាវនាវដល់បងប្អូនប្រជាពលរដ្ឋ កម្មករនិយោជិត ជាពិសេសយុវជនមកពីគ្រួសារក្រីក្រ គ្រួសារងាយរងហានិភ័យ និងបុគ្គលនៃសេដ្ឋកិច្ចក្នុងនិងក្រៅប្រព័ន្ធ បន្តអញ្ជើញទៅចុះឈ្មោះចូលរៀនជំនាញនានា នៅតាមគ្រឹះស្ថានបណ្តុះបណ្តាលបច្ចេកទេសនិងវិជ្ជាជីវៈ នៃក្រសួងការងារនិង បណ្តុះបណ្តាលវិជ្ជាជីវៈ ដែលបន្តចុះឈ្មោះជាប្រចាំ និងបើកថ្នាក់ជាបន្តបន្ទាប់នៅតាមទីរួមខេត្តនានា និងនៅរាជធានីភ្នំពេញ។
សម្ដេចធិបតីនាយករដ្ឋមន្ត្រី បានជំរុញឱ្យវិស័យឯកជនទទួលយកសិក្ខាកាម សិស្ស និស្សិត ឱ្យចូលហាត់ការនៅកន្លែងការងារដើម្បីផ្សារភ្ជាប់ទ្រឹស្តីបទពិសោធដែលមាននៅរោងជាងមជ្ឈមណ្ឌលស្រាវជ្រាវ ទៅនឹងការអនុវត្តជាក់ស្ដែងនៅតាមសហគ្រាស គ្រឹះស្ថាន ដោយមានសភាពាណិជ្ជកម្មកម្ពុជា និងសមាគមនិយោជកចំនួន ១៧ បានឯកភាពចុះអនុស្សរណៈនៃការយោគយល់គ្នាជាមួយក្រសួងការងារនិងបណ្តុះបណ្តាលវិជ្ជាជីវៈ លើកម្មវិធីហាត់ការនេះ និងបន្តនិរន្តរភាព និងបង្កើនប្រសិទ្ធភាពបើកផ្ដល់កម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះមុនពេលសម្រាលកូន និងក្រោយពេលសម្រាលកូនរហូតដល់កូនអាយុ ២ឆ្នាំ ចំនួន ១៤លើក ដោយ១លើកទទួលបានថវិកាចំនួន ៨ម៉ឺនរៀល និងប្រាក់ឧបត្ថម្ភពេលសម្រាលកូនចំនួន ៨០ម៉ឺនរៀល ដើម្បីលើកកម្ពស់សុខុមាលភាពមាតានិងទារក រួមចំណែកដោះស្រាយកង្វះអាហារូបត្ថម្ភ ព្រមទាំងជំរុញការលូតលាស់ទាំងកាយសម្បទា និងបញ្ញាស្មារតីរបស់កូនចៅបងប្អូនកម្មករនិយោជិត។
ក្រៅពីនេះ ក្នុងនាមរាជរដ្ឋាភិបាល និងខ្លួនសម្ដេចផ្ទាល់ នឹងបន្តតាមដាននិងជំរុញយ៉ាងយកចិត្តទុកដាក់ដល់ចលនាប្រកួតប្រជែង ”សហគ្រាសមួយជាសហគមន៍សុខសាន្តមួយ ការបង្កើតឱ្យមានទារកដ្ឋាន និងមត្តេយ្យសហគមន៍ នៅតាមតំបន់ដែលមានរោងចក្រ ឱ្យបានមុនដំណាច់ឆ្នាំ២០២៥ ដោយមានការចូលរួមទ្រទ្រង់ពីនិយោជក កម្មករនិយោជិត និងភាគីពាក់ព័ន្ធនានា ការកែលម្អកន្លែងទទួលទានអាហារ ឬអាហារដ្ឋាននៅតាមរោងចក្រដែលកំពុងដំណើរការ ឱ្យបានសមរម្យសម្រាប់កម្មករនិយោជិត និងតម្រូវឱ្យមានការរៀបចំកន្លែងទទួលទានអាហារ ឬអាហារដ្ឋាន សម្រាប់រោងចក្រដែលត្រូវបង្កើតថ្មី ដោយរួមបញ្ចូលទាំងការគិតគូរអំពីកត្តអនាម័យ រំហូរខ្យល់ និងសីតុណ្ហភាពទាំងនៅកន្លែងទទួលទានអាហារ និងកន្លែងធ្វើការឱ្យបានល្អ ជាពិសេសនៅរដូវប្រាំង ការផ្លាស់ប្តូរជាបណ្ដើរៗនូវមធ្យោបាយដឹកជញ្ជូនកម្មករនិយោជិត ដែលស្របតាមបទដ្ឋានបច្ចេកទេសនិងមានផាសុកភាពជាងមុនត្រឹមឆ្នាំ២០២៧ និងកម្មវិធីធ្វើតេស្តទទួលស្គាល់ជំនាញ ដែលជាឱកាសសម្រាប់បងប្អូនកម្មករនិយោជិត និងពលករទេសន្តប្រវេសន៍អាចទទួលបានវិញ្ញាបនបត្រទទួលស្គាល់ជំនាញ សមត្ថភាពនិងកម្រិតជំនាញ ដើម្បីយកទៅប្រើប្រាស់ជាប្រយោជន៍របស់បងប្អូនកម្មករនិយោជិត ក៏ដូចជាពលករទេសន្តប្រវេសន៍។
រាជរដ្ឋាភិបាលមានជំនឿយ៉ាងមុតមាំថា ការកំណត់យកប្រធានបទ ក៏ដូចជាការបង្កើតកម្មវិធីប្រកួតប្រជែងយកពាន “សហគ្រាសមួយជាសហគមន៍សុខសាន្តមួយ” នឹងជំរុញឱ្យមានចីរភាពនៃវប្បធម៌អនុលោមភាពវប្បធម៌នៃកិច្ចសន្ទនាសង្គម ការយោគយល់អធ្យាស្រ័យគ្នានៅកន្លែងការងារ និងយន្តការដោះស្រាយវិវាទការងារនៅកម្រិតសហគ្រាស គ្រឹះស្ថាន នៅកម្រិតក្រសួង និងនៅកម្រិតក្រុមប្រឹក្សាអាជ្ញាកណ្ដាល។ សម្ដេចធិបតី សន្យានឹងបន្តចុះជួបបងប្អូនកម្មករនិយោជិត ដើម្បីតាមដានវឌ្ឍនភាពនៃការអនុវត្តអនុសាសន៍ដែលសម្ដេចបានដាក់ចេញកន្លងទៅពាក់ព័ន្ធនឹងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ និងក្ដាប់ឱ្យបាននូវសំណូមពររបស់បងប្អូនកម្មករនិយោជិត ទាំងក្នុងប្រព័ន្ធនិងក្រៅប្រព័ន្ធ ក៏ដូចជាបងប្អូនពលករយើងនៅក្រៅប្រទេស៕
ប្រភព៖ AKP
