បរទេស៖ យោងតាមការិយាល័យរបស់រដ្ឋមន្រ្ដីបាននិយាយថា រដ្ឋមន្ត្រីខុទ្ទកាល័យសង្រ្គាមអ៊ីស្រាអែល លោក បេននី ហ្គានហ្ស (Benny Gantz) បានជំរុញឱ្យរដ្ឋមន្ត្រីការបរទេសសហរដ្ឋអាមេរិក លោក អានតូនី ប្លីងខេន (Antony Blinken) នៅក្នុងការសន្ទនាទូរស័ព្ទឱ្យពិចារណាឡើងវិញនូវទណ្ឌកម្មដែលអាចកើតមានប្រឆាំងនឹងអង្គភាពយោធាអ៊ីស្រាអែល។
ការអំពាវនាវជាមួយលោក ប្លីងខេន បានកើតឡើង បន្ទាប់ពីប្រព័ន្ធផ្សព្វផ្សាយអ៊ីស្រាអែលបានរាយការណ៍ថា ក្រសួងការបរទេសសហរដ្ឋអាមេរិកអាចនឹងដាក់ទណ្ឌកម្មលើកងវរសេនាតូចនេតហ្សាហ៍ យេហ៊ូដា (Netzah Yehuda) របស់កងកម្លាំងការពារអ៊ីស្រាអែល (IDF) ដែលត្រូវបានចោទប្រកាន់ពីបទរំលោភសិទ្ធិមនុស្សនៅតំបន់វេស ប៊ែង។
លោក ហ្គានហ្ស បានប្រាប់លោក ប្លីងខេន ថា ការផ្លាស់ប្តូរនេះនឹង «ធ្វើឱ្យប៉ះពាល់ដល់ភាពស្របច្បាប់របស់អ៊ីស្រាអែលក្នុងគ្រាមានសង្រ្គាម» ដោយលោកបានអះអាងថា «គ្មានហេតុផលទេ ពីព្រោះអ៊ីស្រាអែលមានប្រព័ន្ធតុលាការរឹងមាំ និងឯករាជ្យ»។
ទន្ទឹមនឹងនេះដែរ នាយករដ្ឋមន្ត្រី លោក បេនចាមីន ណេតាន់យ៉ាហ៊ូ (Benjamin Netanyahu) បានប្តេជ្ញាថា នឹងប្រយុទ្ធប្រឆាំងនឹងទណ្ឌកម្មណាមួយដែលត្រូវបានដាក់លើផ្នែកខ្លះនៃកងកម្លាំង IDF ដោយ «កម្លាំងទាំងអស់»។ នេះបើយោងតាមសេចក្តីថ្លែងការណ៍របស់លោក។
កងកម្លាំង IDF បាននិយាយថា កងវរសេនាតូចនេតហ្សាហ៍ យេហ៊ូដា បច្ចុប្បន្នកំពុងចូលរួមក្នុងការប្រយុទ្ធនៅតំបន់ហ្គាហ្សាស្ទ្រីប។ យោធាបាននិយាយនៅក្នុងសេចក្តីថ្លែងការណ៍មួយថា «កងវរសេនាតូចកំពុងធ្វើប្រតិបត្តិការប្រកបដោយវិជ្ជាជីវៈ និងក្លាហានស្របតាមក្រមសីលធម៌របស់កងកម្លាំង IDF និងជាមួយនឹងការប្តេជ្ញាចិត្តពេញលេញចំពោះច្បាប់អន្តរជាតិ»៕
ប្រភព៖ AKP
