បរទេស៖ រដ្ឋមន្ត្រីការបរទេសចិន លោក វ៉ាង យី (Wang Yi) បានជួបពិភាក្សាជាមួយ លោកស្រី តាន់ចា ហ្វាជុន (Tanja Fajon) ឧបនាយករដ្ឋមន្ត្រី និងជារដ្ឋមន្ត្រីការបរទេសស្លូវេនី នៅទីក្រុងប៉េកាំង កាលពីថ្ងៃពុធ ហើយភាគីទាំងពីរបានសន្យាបង្កើនកិច្ចសហប្រតិបត្តិការលើវិស័យផ្សេងៗ។
លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនបានកត់សម្គាល់ថា បន្ទាប់ពីរយៈពេលជាង ៣០ឆ្នាំនៃការអភិវឌ្ឍ ទំនាក់ទំនងរវាងប្រទេសចិន និងស្លូវេនីបានឈានចូលដំណាក់កាលស្ថិរភាព និងចាស់ទុំ។
លោក វ៉ាង បាននិយាយថា ប្រទេសចិនកោតសរសើរ ចំពោះការយល់ដឹងរបស់រដ្ឋាភិបាលស្លូវេនី និងគាំទ្រចំពោះផលប្រយោជន៍ស្នូលរបស់ប្រទេសចិន និងការប្រកាន់ខ្ជាប់យ៉ាងម៉ឺងម៉ាត់ចំពោះគោលការណ៍ចិនតែមួយ លោកបានបន្ថែមថា ប្រទេសចិនគាំទ្រឯករាជ្យជាតិ អធិបតេយ្យភាព និងបូរណភាពទឹកដីរបស់ប្រទេសស្លូវេនី ហើយគោរពតាមមាគ៌ាអភិវឌ្ឍន៍របស់ប្រទេសស្លូវេនីដែលសមស្របនឹងលក្ខខណ្ឌជាតិរបស់ខ្លួន។
លោក វ៉ាង បាននិយាយថា ប្រទេសចិនអបអរសាទរចំពោះប្រទេសស្លូវេនី ក្នុងការបោះឆ្នោតរបស់ខ្លួនជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់ឆ្នាំ២០២៤-២០២៥ និងត្រៀមខ្លួនរួចជាស្រេចក្នុងការពង្រឹងកិច្ចសហប្រតិបត្តិការជាមួយប្រទេសស្លូវេនីក្នុងក្រុមប្រឹក្សាសន្តិសុខអង្គការសហប្រជាជាតិ និងស្ថាប័នអន្តរជាតិផ្សេងទៀត ដើម្បីលើកកម្ពស់អភិបាលកិច្ចពិភពលោកក្នុងទិសដៅដ៏ត្រឹមត្រូវ និងសមធម៌។
លោកស្រី ហ្វាជុន បាននិយាយថា ប្រទេសស្លូវេនីយកចិត្តទុកដាក់យ៉ាងខ្លាំង ចំពោះទំនាក់ទំនងរបស់ខ្លួនជាមួយប្រទេសចិន ហើយបន្តយ៉ាងម៉ឺងម៉ាត់នូវគោលនយោបាយចិនតែមួយ។ ប្រទេសស្លូវេនីបានបញ្ជូនគណៈប្រតិភូសេដ្ឋកិច្ច និងពាណិជ្ជកម្មដ៏ធំបំផុតមិនធ្លាប់មានទៅកាន់ប្រទេសចិននៅពេលនេះ ហើយមានឆន្ទៈក្នុងការធ្វើឱ្យស៊ីជម្រៅបន្ថែមទៀត នូវកិច្ចសហប្រតិបត្តិការជាក់ស្តែងជាមួយប្រទេសចិនក្នុងវិស័យសេដ្ឋកិច្ច ពាណិជ្ជកម្ម ទេសចរណ៍ និងការច្នៃប្រឌិតវិទ្យាសាស្ត្រ និងបច្ចេកវិទ្យា។
លោកស្រី ហ្វាជុន បាននិយាយថា ប្រទេសស្លូវេនីមានឆន្ទៈក្នុងការពង្រឹងការសម្របសម្រួល និងកិច្ចសហប្រតិបត្តិការជាមួយប្រទេសចិន ក្រោមអង្គការសហប្រជាជាតិ និងក្របខណ្ឌពហុភាគីផ្សេងទៀត ដើម្បីរួមគ្នាដោះស្រាយបញ្ហាប្រឈមជាសកល៕
ប្រភព៖ AKP
