បរទេស៖ អាជ្ញាធរថៃបាននិយាយកាលពីថ្ងៃទី១៦ ខែមេសាថា ចំនួននៃគ្រោះថ្នាក់ចរាចរណ៍ក្នុងអំឡុងពេលប្រាំថ្ងៃដំបូងនៃសប្តាហ៍យុទ្ធនាការសុវត្ថិភាពចរាចរណ៍នៃពិធីបុណ្យសង្រ្កាន្តឆ្នាំថ្មី បានធ្លាក់ចុះ ១០,៤% ពីមួយឆ្នាំទៅមួយឆ្នាំ មកនៅត្រឹម ១.៥៦៤ករណី។
គ្រោះថ្នាក់ចរារចណ៍បានសម្លាប់មនុស្សចំនួន ២០៦នាក់ និងរបួស ១.៥៩៣នាក់ផ្សេងទៀត ចាប់ពីថ្ងៃទី១១ ដល់ថ្ងៃទី១៥ ខែមេសា បើធៀបនឹងករណីស្លាប់ចំនួន ២០០នាក់ និង ១.៧៣៧នាក់ ដែលត្រូវបានកត់ត្រាក្នុងឆ្នាំមុន។
លោក ចុលណាន ស្រ៊ីកែវ (Cholnan Srikaew) រដ្ឋមន្ត្រីក្រសួងសុខភាពសាធារណៈរបស់ប្រទេសថៃ បាននិយាយថា ក្នុងចំណោមខេត្តចំនួន៧៧ មាន ១៧ខេត្តដែលមិនមានកត់ត្រាករណីគ្រោះថ្នាក់ចរាចរណ៍ដែលបណ្តាលឱ្យស្លាប់រហូតមកដល់ពេលនេះ។
ខេត្តឈៀងរ៉ៃដែលនៅភាគខាងជើងបំផុត មានគ្រោះថា្នក់ចរាចរណ៍ច្រើនជាងគេ ដែលមានចំនួន ៦១ករណី ចំណែកខេត្តណានដែលនៅភាគខាងជើងផងដែរនោះ មានអ្នករបួសច្រើនជាងគេចំនួន ៦០នាក់។ ទីក្រុងបាងកក និងខេត្តឈៀងរ៉ៃ មានអ្នកស្លាប់ច្រើនជាងគេ ដែលនីមួយៗកត់ត្រាក្នុងចំនួន ១៣ករណី។
មូលហេតុចម្បងនៃគ្រោះថ្នាក់ចរាចរណ៍ទាំងនោះ គឺបណ្តាលមកពីការបើកបរលើសល្បឿន ដែលមានចំនួន ៤៣,២% បើកបរដោយស្ថានភាពស្រវឹងចំនួន ២៣,៩% និងការបើកបរឆ្លងផ្លូវចំនួន ១៥,៣%។ នៅក្នុងករណីសរុបនៃគ្រោះថ្នាក់ទាំងនោះ មានម៉ូតូចំនួន ៨៣,៨%។
ជាមួយគ្នានេះដែរ លោក រឿងសាក់ ស៊ូវ៉ារី (Ruangsak Suwaree) អគ្គនាយកនៃអគ្គនាយកដ្ឋានពន្ធដារ បានឱ្យដឹងថា ចាប់ពីថ្ងៃទី១១ ដល់ថ្ងៃទី១៥ ខែមេសា មានករណីល្មើសច្បាប់ចរាចរណ៍ចំនួន ៤.១៣២ករណី ដោយក្នុងនោះ ៩៦% ពាក់ព័ន្ធនឹងការបើកបរក្នុងស្ថានភាពស្រវឹង។
ផ្លូវថ្នល់នានារបស់ប្រទេសថៃជាផ្លូវដែលមានមនុស្សស្លាប់ច្រើនជាងគេនៅតំបន់អាស៊ីអាគ្នេយ៍។ ក្នុងឆ្នាំ២០១៨ អង្គការសុខភាពពិភពលោកបានដាក់ចំណាត់ថ្នាក់ប្រទេសថៃជាប្រទេសលេខ៩ ដែលមានអត្រាស្លាប់ដោយសារគ្រោះថ្នាក់ចរាចរណ៍ខ្ពស់បំផុត ដោយមានអ្នកស្លាប់ចំនួន ៣២,៧នាក់ក្នុងចំណោមប្រជាជន ១០០.០០០នាក់ក្នុងមួយឆ្នាំៗ៕
ប្រភព៖ AKP
