បរទេស៖ ការប្រមូលផ្តុំធូលីភាគល្អិតនៅក្នុងបណ្តាខេត្ត និងទីក្រុងនានានៅក្នុងប្រទេសឡាវ ត្រូវបានគេរាយការណ៍កាលពីថ្ងៃទី០៩ ខែមេសាថា មានគ្រោះថ្នាក់ដល់សុខភាពមនុស្ស។
មជ្ឈមណ្ឌលស្រាវជ្រាវធនធានធម្មជាតិ និងបរិស្ថានឡាវ បាននិយាយថា បណ្តាខេត្តភាគខាងជើងកំពុងរាយការណ៍ថាមានកំហាប់ខ្ពស់ ដែលរួមមានខេត្តផុងសាលី (កម្រិត ២៥៧មីក្រូក្រាមក្នុងមួយម៉ែត្រគូប) ខេត្តស៊ីងឃួង (កម្រិត ២០៩មីក្រូក្រាមក្នុងមួយម៉ែត្រគូប) និងខេត្តឧត្តមសាយ (កម្រិតជាង ៣០០មីក្រូក្រាមក្នុងមួយម៉ែត្រគូប)។
មូលហេតុ គឺមកពីការដុតចំបើង និងស្រែ ដើម្បីត្រៀមបង្កបង្កើនផលថ្មី ភ្លើងឆេះព្រៃ និងការបំភាយពីយានយន្តដែលធ្វើចរាចរណ៍។
ជាមួយគ្នានេះដែរ នាយកដ្ឋានជលសាស្ត្រនៃក្រសួងធនធានធម្មជាតិ និងបរិស្ថាន ក៏បានព្រមានដល់អាជ្ញាធរមូលដ្ឋាន និងប្រជាពលរដ្ឋនៃតាមបណ្តាខេត្តភាគខាងជើង ភាគកណ្តាល និងភាគខាងត្បូងមួយចំនួនផងដែរ អំពីលទ្ធភាពនៃបាតុភូតផ្គរ រន្ទះ ខ្យល់ខ្លាំង និងខ្យល់កន្ត្រាក់ក្នុងប៉ុន្មានថ្ងៃខាងមុខនេះ៕
ប្រភព៖ AKP
