បរទេស៖ បណ្តាក្រុមហ៊ុននាំចេញអង្ករថៃបានរំពឹងថា តម្លៃអង្ករជាសកលនឹងកើនឡើងនៅក្នុងត្រីមាសទីពីរ ដោយសារតែផលប៉ះពាល់នៃបាតុភូតអាកាសធាតុអ៊ែលនីណូ និងការរឹតបន្តឹងការនាំចេញអង្កររបស់ប្រទេសឥណ្ឌា។ នេះបើយោងតាមការចុះផ្សាយរបស់កាសែតបាងកកប៉ុស្តិ៍។
លោក ជូគៀត អូផាសវង្សេ (Chookiat Ophaswongse) ប្រធានកិត្តិយសនៃសមាគមអ្នកនាំចេញអង្ករថៃ បាននិយាយថា ការនាំចេញអង្ករបានកើនឡើងដល់ ២,៥លានតោននៅក្នុងត្រីមាសទីមួយ ដោយសារអ្នកនាំចេញបានប្តេជ្ញាចិត្តក្នុងការចែកចាយនូវបរិមាណដ៏ច្រើន ជាពិសេសអង្ករសទៅកាន់ទីផ្សារអាស៊ីអាគ្នេយ៍សំខាន់ៗ ដូចជាប្រទេសឥណ្ឌូណេស៊ី ហ្វីលីពីន និងម៉ាឡេស៊ី ក៏ដូចជាតំបន់អាហ្វ្រិក និងមជ្ឈិមបូព៌ា។
លោកបាននិយាយថា ប្រទេសនាំចូលអង្ករស និងអង្ករក្រអូបសំខាន់ៗ គឺសហរដ្ឋអាមេរិក និងតំបន់អាស៊ី ដែលត្រូវបានគេរំពឹងថានឹងប្រកាសនូវតម្រូវការអង្ករស និងអង្ករក្រអូបច្រើនសម្រាប់ការផ្គត់ផ្គង់ក្នុងស្រុក ចំពេលតម្លៃនៅក្នុងសកលលោកមានកម្រិតខ្ពស់។ ការផ្គត់ផ្គង់អង្កររបស់ប្រទេសថៃនៅមានកម្រិតគ្រប់គ្រាន់ ហើយតម្លៃអង្កររបស់ខ្លួនមានការប្រកួតប្រជែងដោយសារការធ្លាក់ចុះតម្លៃប្រាក់ដុល្លារអាម៉េរិក។
លោកបាននិយាយបន្តថា នៅត្រីមាសទីពីរនេះ ទំហំការនាំចេញអាចនឹងធ្លាក់ចុះបន្តិចដោយសារការប្រកួតប្រជែងកាន់តែខ្លាំង ខណៈដែលរដូវប្រមូលផលរបស់ប្រទេសវៀតណាមចាប់ផ្តើមកាលពីក្នុងខែមីនា។
លោកក៏បានកត់សម្គាល់ផងដែរនូវការនាំចេញអង្កររបស់ប្រទេសថៃនៅក្នុងឆ្នាំនេះដែលទំនងជាឈានដល់ចំនួន ៨លានតោន ជាមួយនឹងតម្លៃប៉ាន់ស្មានចំនួន ១៨០ប៊ីលានបាត (៤,៩២ប៊ីលានដុល្លារអាម៉េរិក) លើសពីការព្យាករណ៍ពីមុនដែលមានចំនួន ៧,៥លានតោន ដោយមានតម្លៃ ១៥០ប៊ីលានបាត៕
ប្រភព៖ AKP
