មន្ត្រីសុខភាពសាធារណៈរបស់ប្រទេសថៃ កំពុងរៀបចំបើកមជ្ឈមណ្ឌលប្រតិបត្តិការសង្គ្រោះបន្ទាន់ (EOC) ដើម្បីគ្រប់គ្រងស្ថានការណ៍ករណីឆ្លងជំងឺកូវីដ-១៩ នៅក្នុងពន្ធនាគារខេត្តប្រាជួបគិរីខាន់ ដែលនៅទីនោះមានករណីឆ្លងជាច្រើនត្រូវបានបញ្ជាក់។
លោកវេជ្ជបណ្ឌិត អូប៉ាស់ កានកាវីនពង្ស (Opas Karnkawinpong) លេខាធិការអចិន្ត្រៃយ៍ផ្នែកសុខភាពសាធារណៈបាននិយាយថា អាជ្ញាធរបានបង្កើនកិច្ចខិតខំប្រឹងប្រែងឃ្លាំមើលបន្ទាប់ពីការរកឃើញករណីឆ្លងជំងឺកូវីដ-១៩ ចំនួន ៧៩ករណីនៅក្នុងពន្ធនាគារ។
លោកបាននិយាយបន្តថា ករណីឆ្លងដំបូងត្រូវបានរកឃើញកាលពីថ្ងៃទី២៧ ខែមីនា នៅពេលអ្នកទោសស្រីអាយុ ៣៥ឆ្នាំម្នាក់ត្រូវបានគេបញ្ជូនទៅកាន់មន្ទីរពេទ្យប្រាជួបគិរីខាន់ ដោយមានរោគសញ្ញាដូចជាជំងឺផ្ដាសាយ ហើយបានធ្វើតេស្តវិជ្ជមានសម្រាប់ជំងឺកូវីដ-១៩។
លោកបាននិយាយបន្ថែមថា ទន្ទឹមនឹងនេះដែរ អ្នកទោសប្រុសម្នាក់ក៏បានធ្វើតេស្តវិជ្ជមានជំងឺកូវីដ-១៩ ក្នុងពេលពិនិត្យសុខភាពសម្រាប់ការផ្ទេរពន្ធនាគារដែរ។
ចាប់ពីថ្ងៃទី១៧ ដល់ថ្ងៃទី២៣ ខែមីនា ករណីឆ្លងថ្មីនៃជំងឺកូវីដ-១៩ ចំនួន ៦៣០ករណី និងការស្លាប់ចំនួន ៥ករណីត្រូវបានរកឃើញនៅក្នុងប្រទេសថៃ។ នេះបើយោងតាមរបាយការណ៍ប្រចាំសប្តាហ៍របស់នាយកដ្ឋានគ្រប់គ្រងជំងឺបានចេញផ្សាយ៕
ប្រភព៖ AKP
