បរទេស៖ សភាឥណ្ឌូណេស៊ី កាលពីពេលថ្មីៗនេះ បានកំណត់ឋានៈពិសេសមួយសម្រាប់ទីក្រុងហ្សាកាតា ដោយរក្សាទីក្រុងនេះជាមជ្ឈមណ្ឌលសេដ្ឋកិច្ចរបស់ប្រទេស ខណៈដែលប្រទេសក្នុងតំបន់អាស៊ីអាគ្នេយ៍មួយនេះ គ្រោងនឹងផ្លាស់ប្តូររដ្ឋធានីទៅកាន់កោះបូណេអូ។
រដ្ឋមន្ត្រីក្រសួងមហាផ្ទៃឥណ្ឌូណេស៊ី លោក ទីតូ កាណាវៀន (Tito Karnavian) បាននិយាយបន្ទាប់ពីកិច្ចពិភាក្សានៅក្នុងសភាថា ទីក្រុងហ្សាកាតាគួរតែនៅតែត្រូវបានធ្វើឱ្យប្រសើរឡើងដើម្បីប្រកួតប្រជែងជាមួយនឹង «ទីក្រុងលំដាប់ពិភពលោក» ផ្សេងទៀត នៅពេលដែលរដ្ឋាភិបាលត្រូវបានផ្លាស់ប្តូរទៅកាន់រដ្ឋធានីនូសាន់តារ៉ា។
បើយោងតាមលោករដ្ឋមន្ត្រី បានឱ្យដឹងថា វានៅតែត្រូវផ្សាភ្ជាប់ជាមួយនឹងឋានៈពិសេស ដើម្បីអាចពន្លឿនកំណើនសេដ្ឋកិច្ច និងបង្កើនការរួមចំណែកដល់ផលិតផលក្នុងស្រុកសរុប (GDP) របស់ប្រទេស។
ប្រទេសឥណ្ឌូណេស៊ីគ្រោងនឹងផ្លាស់ប្តូររដ្ឋធានីរបស់ខ្លួនឱ្យជៀសឆ្ងាយពីការកកស្ទះ និងការលិចទីក្រុងហ្សាកាតា ទៅកាន់ទីក្រុងនូសាន់តារ៉ាដែលជាទីក្រុងមានតម្លៃ ៣២ប៊ីលានដុល្លារអាម៉េរិក ដែលកំពុងសាងសង់នៅក្នុងខេត្តកាលីម៉ាន់តាន់ខាងកើត នៅលើកោះបូណេអូ។
រដ្ឋាភិបាលឥណ្ឌូណេស៊ីត្រូវបានគេរំពឹងថានឹងរៀបចំពិធីមួយដើម្បីប្រារព្ធទិវាឯករាជ្យរបស់ប្រទេសនៅថ្ងៃទី១៧ ខែសីហា នៅទីក្រុងនូសាន់តារ៉ា ហើយមន្ត្រីរាជការរាប់ពាន់នាក់ត្រូវបានគេរំពឹងថានឹងផ្លាស់ទៅទីនោះនៅត្រឹមចុងឆ្នាំនេះ៕
ប្រភព៖ AKP
