បរទេស៖ សាស្រ្តាចារ្យថៃម្នាក់បាននិយាយថា ប្រសិនបើកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ មិនត្រូវបានអនុវត្តប្រកបដោយប្រសិទ្ធភាពទេ តំបន់អាស៊ីអាគ្នេយ៍អាចរងផលប៉ះពាល់ខ្លាំងដោយរលកកំដៅជាងតំបន់ផ្សេងទៀត ហើយប្រទេសថៃអាចប្រឈមនឹងអាកាសធាតុក្តៅខ្លាំងរហូតដល់រយៈពេល ២២០ថ្ងៃក្នុងមួយឆ្នាំសម្រាប់រយៈពេលប្រហែល ២០ឆ្នាំ។
លោកសាស្ត្រាចារ្យ សេរី ស៊ូប៉ារ៉ាធីត (Seree Suparathit) នាយកមជ្ឈមណ្ឌលសម្រាប់ការប្រែប្រួលអាកាសធាតុ និងគ្រោះមហន្តរាយនៃសាកលវិទ្យាល័យរ៉ាងស៊ីត បាននិយាយថា ប្រសិនបើគោលដៅកំណត់ដោយសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិ (COP21) ដែលធ្វើឡើងនៅទីក្រុងប៉ារីសកាលពីក្នុងខែធ្នូ ឆ្នាំ២០១៥ មិនអាចសម្រេចបានទេនោះ តំបន់អាស៊ីអាគ្នេយ៍ និងជាពិសេសប្រទេសថៃ នឹងរងផលប៉ះពាល់ធ្ងន់ធ្ងរ។
COP21 បានសម្រេចចិត្តកំណត់ការឡើងកំដៅផែនដីឱ្យនៅខាងក្រោម ២អង្សាសេ លើសពីកម្រិតមុនឧស្សាហកម្ម និងបន្តវិធីកំណត់វាឱ្យនៅត្រឹម ១,៥អង្សាសេ។
យោងតាមរបាយការណ៍វាយតម្លៃទី៥ (AR5) និងរបាយការណ៍វាយតម្លៃទី៦ (AR6) នៃក្រុមអន្តររដ្ឋាភិបាលស្តីពីការប្រែប្រួលអាកាសធាតុ (IPCC) បានឱ្យដឹងថា ប្រសិនបើសីតុណ្ហភាពពិភពលោកកើនឡើងដល់ ១,៥អង្សាសេ ប្រទេសថៃនឹងរងការវាយប្រហារដោយរលកកំដៅក្នុងរយៈពេលពី ២០ថ្ងៃទៅ ៣០ថ្ងៃ នៅភាគខាងជើង ភាគឦសាន និងភាគកណ្តាល និងក្នុងរយៈពេលពី ៣០ថ្ងៃទៅ ៤០ថ្ងៃ នៅខេត្តភាគកណ្តាល ភាគឦសាន និងភាគខាងកើត។
ប្រសិនបើសីតុណ្ហភាពសកលលោកកើនឡើង ២អង្សាសេ ចំនួនថ្ងៃក្តៅខ្លាំងនឹងមានពី ៥០ថ្ងៃទៅ ៦០ថ្ងៃនៅភាគខាងជើង ភាគឦសានកណ្តាល និងភាគឦសានខាងលើ និងពី ៦០ថ្ងៃទៅ ៨០ថ្ងៃនៅភាគកណ្តាល ភាគបូព៌ា និងភាគឦសាន។
ក្នុងករណីដ៏អាក្រក់បំផុត ប្រសិនបើសីតុណ្ហភាពសកលលោកកើនឡើង ៤,៥អង្សាសេ រលកកំដៅអាចជួបប្រទះនឹងមានរយៈពេលពី ១៨០ថ្ងៃទៅ ២២០ថ្ងៃនៅភាគខាងជើង ភាគកណ្តាល និងភាគឦសាន និងពី ២២០ថ្ងៃទៅ ២៤០ថ្ងៃនៅតំបន់ភាគកណ្តាល ភាគបូព៌ា និងភាគឦសាន។
លោកបាននិយាយថា ប្រទេសទាំងអស់ត្រូវតែធ្វើសកម្មភាពឥឡូវនេះ ដើម្បីអនុវត្តសេចក្តីសម្រេច COP21៕
ប្រភព៖ AKP
