មនុស្សចំនួន ៦​នាក់​​ស្លាប់​ក្នុងហេតុ​ការណ៍​បាក់​ស្ពាននៅទីក្រុង​បាល់ទីម័រ

បរទេស៖ យោងតាមរបាយការណ៍ដំបូង បានឱ្យដឹងថា យ៉ាងហោចណាស់មនុស្សចំនួន ៦នាក់ត្រូវបានគេសន្មត់ថាត្រូវបានស្លាប់ដោយសារហេតុការណ៍បាក់ស្ពានកាលពីពេលថ្មីៗនេះនៅទីក្រុងបាល់ទីម័រ នៃរដ្ឋម៉ារីលែនដ៍របស់សហរដ្ឋអាមេរិក។ នេះបើយោងតាមការរាយការណ៍របស់សារព័ត៌មាន NBC News។

លោក ជេហ្វហ្រ្វី ព្រីតហ្ស៍កឺ (Jeffrey Pritzker) អនុប្រធានប្រតិបត្តិនៃក្រុមហ៊ុនសំណង់ Brawner Builders ត្រូវបានដកស្រង់សម្តីដោយសារព័ត៌មានដែលបាននិយាយថា កម្មករសំណង់ចំនួន ៦នាក់ត្រូវបានគេសន្មត់ថាបានស្លាប់ ហើយមនុស្ស​ម្នាក់​បាន​រួច​ជីវិត។

ស្ពានហ្រ្វេស៊ីស ស្កតត៍ ឃី (Francis Scott Key) នៅទីក្រុងបាល់ទីម័រ បានដួលរលំកាលពីថ្ងៃទី២៥ ខែមីនា បន្ទាប់ពីវាត្រូវបានបុកដោយនាវាដឹកទំនិញដាលី (Dali) ដែលកំពុងធ្វើដំណើរក្រោមទង់ជាតិសិង្ហបុរី។ វីដេអូ​នៃ​ការ​ដួល​រលំស្ពាននេះ​ត្រូវ​បាន​ផ្សព្វផ្សាយ​តាម​បណ្តាញ​សង្គម។ ក្រោយ​ពី​មាន​ការ​ប៉ះ​ទង្គិច​រួច កំណាត់​ស្ពាន​បាន​បាក់ ហើយ​រថយន្ត​ជា​ច្រើន​គ្រឿង​ដែល​ជិះនៅលើស្ពាន​នោះ​បាន​ធ្លាក់​ចូល​ទៅ​ក្នុង​ទឹក។ អភិបាលរដ្ឋម៉ារីលែនដ៍ លោក វេស មូរេ (Wes Moore) បានប្រកាសដាក់រដ្ឋក្នុងភាពអាសន្នជុំវិញឧបទ្ទវហេតុនេះ៕

ប្រភព៖ AKP