បរទេស៖ យោងតាមសេវាសារព័ត៌មាន នៃក្រសួងកិច្ចការផ្ទៃក្នុងប្រទេសបានរាយការណ៍កាលពីថ្ងៃចន្ទថា វិធានការសន្តិសុខនឹងត្រូវបានពង្រឹងនៅក្នុងមជ្ឈមណ្ឌលផ្សារទំនើបក្នុងរដ្ឋធានីកៀគីស បន្ទាប់ពីការវាយប្រហារភេរវកម្មនៅទីក្រុងមូស្គូ។
របាយការណ៍បាននិយាយថា អនុរដ្ឋមន្ត្រីក្រសួងកិច្ចការផ្ទៃក្នុង លោក នូរបេក អាប់ដេវ (Nurbek Abdiev) បានជួបប្រជុំជាមួយម្ចាស់ និងអ្នកគ្រប់គ្រងមជ្ឈមណ្ឌលផ្សារទំនើប និងកន្លែងកម្សាន្ត ក៏ដូចជាតំណាងក្រុមហ៊ុនសន្តិសុខឯកជន។
ក្នុងជំនួបនោះ លោកអនុរដ្ឋមន្ត្រីបានអំពាវនាវឱ្យពួកគេរឹតបន្តឹងសន្តិសុខ ដំឡើងប្រព័ន្ធសំឡេងរោទិ៍ ជ្រើសរើសបុគ្គលិកសន្តិសុខដោយប្រុងប្រយ័ត្ន និងចុះត្រួតពិនិត្យទីកន្លែងដើម្បីស្វែងរកអាវុធជាតិផ្ទុះ ឬវត្ថុសង្ស័យឱ្យបានទាន់ពេលវេលា។
ពួកគេក៏បានពិភាក្សាអំពីវិធានការទប់ស្កាត់ឧក្រិដ្ឋកម្ម ដោយប្រើអាវុធនៅកន្លែងដែលមានមនុស្សច្រើនផងដែរ។ លោក អាប់ដេវ បានលើកឡើងពីផលវិបាកដ៏សោកនាដកម្ម នៃការវាយប្រហារភេរវកម្មនៅទីក្រុងមូស្គូ ដែលបានបណ្តាលឲ្យមនុស្សយ៉ាងហោចណាស់ ១៣៧នាក់ស្លាប់។
នៅចុងបញ្ចប់នៃកិច្ចប្រជុំនេះ មន្ត្រីរូបនេះបានអំពាវនាវដល់ប្រជាពលរដ្ឋទាំងអស់ ត្រូវមានការប្រុងប្រយ័ត្ន និងសហការគ្នា ដើម្បីធានាបាននូវសុវត្ថិភាព៕
ប្រភព៖ AKP
