បរទេស៖ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានប្រកាសកាលពីពេលថ្មីៗនេះថា អាជ្ញាធរអ៊ីស្រាអែលបានបញ្ជាឱ្យជម្លៀសប្រជាជននៅតំបន់ហ្កាហ្សាស្ទ្រីបភាគខាងត្បូង។
សេវាសារព័ត៌មានរបស់ការិយាល័យនោះបាននិយាយនៅក្នុងសេចក្តីថ្លែងការណ៍មួយថា «នៅថ្ងៃទី២០ ខែធ្នូ យោធាអ៊ីស្រាអែលបានកំណត់តំបន់ថ្មីមួយដែលគ្របដណ្តប់ប្រហែល ២០% នៃភាគកណ្តាល និងភាគខាងត្បូងនៃទីក្រុងខាន់យូនីស សម្រាប់ការជម្លៀសជាបន្ទាន់មួយ»។
ដូចដែលបានកត់សម្គាល់ដោយការិយាល័យ OCHA មានជម្រកចំនួន ៣២កន្លែងនៅក្នុងទឹកដីដែលកំណត់ដោយយោធាអ៊ីស្រាអែល ដែលផ្តល់ជម្រកដល់ជនភៀសខ្លួនខាងក្នុងជាង ១៤១.០០០នាក់ដែលត្រូវបានបង្ខំឱ្យចាកចេញពីភាគខាងជើងនៃតំបន់ហ្កាហ្សាស្ទ្រីប។
នៅពេលមុននេះ រដ្ឋមន្ត្រីការពារជាតិអ៊ីស្រាអែល លោក Yoav Galant បាននិយាយថា ប្រតិបត្តិការជើងគោកនៅតំបន់ហ្កាហ្សា នឹងត្រូវពង្រីកទៅកាន់តំបន់ថ្មី ដែលរួមមានទាំងតំបន់ខាន់យូនីសផងដែរ ដែលរដ្ឋមន្ត្រីនោះបាននិយាយថា វាបានក្លាយជារដ្ឋធានីថ្មីនៃក្រុមភេរវកម្ម។
ភាពតានតឹងបានផ្ទុះឡើងនៅមជ្ឈិមបូព៌ា បន្ទាប់ពីពួកសកម្មប្រយុទ្ធហាម៉ាស់មកពីតំបន់ហ្កាហ្សាស្ទ្រីបបានវាយប្រហារទឹកដីអ៊ីស្រាអែលកាលពីថ្ងៃទី៧ ខែតុលា នៅពេលដែលជនជាតិអ៊ីស្រាអែលជាច្រើនដែលរស់នៅក្បែរព្រំដែនត្រូវបានសម្លាប់ ហើយមនុស្សជាង ២០០នាក់រួមទាំងកុមារ ស្ត្រី និងមនុស្សចាស់ផងនោះត្រូវបានចាប់ធ្វើជាចំណាប់ខ្មាំង។ ក្រុមហាម៉ាស់ចាត់ទុកការវាយប្រហាររបស់ខ្លួន ថាជាការឆ្លើយតបទៅនឹងការអនុវត្តរបស់អាជ្ញាធរអ៊ីស្រាអែលប្រឆាំងនឹងវិហារអ៊ីស្លាមអាល់-អាកសា នៅក្នុងទីក្រុងហ្សេរុយសាឡឹម។ អ៊ីស្រាអែលបានប្រកាសបិទច្រកហ្កាហ្សាទាំងស្រុង ហើយបានបើកការទម្លាក់គ្រាប់បែកលើតំបន់ព័ទ្ធជុំវិញ និងតំបន់មួយចំនួនក្នុងប្រទេសលីបង់ និងស៊ីរី។ ការប៉ះទង្គិចគ្នាក៏ត្រូវបានរាយការណ៍ផងដែរនៅក្នុងវេសប៊ែង៕
ប្រភព៖ AKP
