បរទេស៖ សារព័ត៌មាន Axios បានរាយការណ៍ដោយដកស្រង់ពីប្រភពនានាថា ប្រទេសអ៊ីស្រាអែលបានផ្តល់ជូនដល់ក្រុមហាម៉ាស់ឱ្យបញ្ឈប់ការប្រយុទ្ធគ្នានៅតំបន់ហ្គាហ្សារយៈពេលមួយសប្តាហ៍ ដែលជាផ្នែកនៃកិច្ចព្រមព្រៀងថ្មីមួយដើម្បីដោះលែងចំណាប់ខ្មាំងជាង ៣០នាក់ដែលចលនារ៉ាឌីកាល់ប៉ាឡេស្ទីនហាម៉ាស់កំពុងចាប់ឃុំខ្លួនក្នុងតំបន់នោះ។
យោងតាមប្រភពទាំងនោះ បានឱ្យដឹងថា ប្រធានទីភ្នាក់ងារស៊ើបការណ៍សម្ងាត់ម៉ូសសាដរបស់អ៊ីស្រាអែល លោក ដាវីដ បានា បានពិភាក្សាអំពីគំនិតផ្តួចផ្តើមចុងក្រោយនេះរបស់អ៊ីស្រាអែល ដើម្បីបន្តកិច្ចចរចាសន្តិភាពនៅទីក្រុង Warsaw កាលពីពេលថ្មីៗនេះជាមួយប្រធាន CIA លោក វីល្លៀម ប៊នស៍ និងនាយករដ្ឋមន្ត្រីកាតា លោក ម៉ូហាំម៉េដ ប៊ីន អាប់ឌុលរ៉ាម៉ាន់ អាល់ ថានី។ ប្រភពនោះបានប្រាប់សារព័ត៌មាន Axios ថា លោក បានា បានបង្ហាញសំណើមួយដើម្បីធានាដល់ការដោះលែងក្រុមចំណាប់ខ្មាំងប្រហែល ៤០នាក់ដែលនឹងរាប់បញ្ចូលទាំងបុរសដែលមានអាយុលើសពី ៦០ឆ្នាំ និងចំណាប់ខ្មាំងដទៃទៀតដែលត្រូវការការថែទាំសុខភាពជាបន្ទាន់។ ជាថ្នូរនឹងការដោះលែងចំណាប់ខ្មាំងទាំងនោះ ប្រទេសអ៊ីស្រាអែលអាចត្រៀមខ្លួនដើម្បីផ្អាកការប្រយុទ្ធយ៉ាងហោចណាស់មួយសប្តាហ៍ ឬក៏អាចដោះលែងអ្នកទោសប៉ាឡេស្ទីនជាច្រើននាក់ ដែលត្រូវបានកាត់ទោសពីបទឧក្រិដ្ឋកម្មធ្ងន់ធ្ងរជាងអ្នកដែលត្រូវបានដោះលែងក្រោមកិច្ចព្រមព្រៀងពីមុន។
វិបផតថលព័ត៌មាននោះបាននិយាយថា នេះ គឺជាសំណើដំបូងដែលអ៊ីស្រាអែលបានផ្តល់ជូនចាប់តាំងពីថ្ងៃទី០១ ខែធ្នូមក នៅពេលដែលកងកម្លាំងការពារអ៊ីស្រាអែលបានចោទប្រកាន់ក្រុមហាម៉ាស់ថាបានបំពានច្បាប់នៃបទឈប់បាញ់ និងបន្តការប្រយុទ្ធគ្នានៅតំបន់ហ្គាហ្សា។ នៅឯកិច្ចប្រជុំនៅទីក្រុង Warsaw ប្រទេសកាតាបានបញ្ជូនសាររបស់ក្រុមហាម៉ាស់ដែលបាននិយាយថា អ៊ីស្រាអែលត្រូវតែបញ្ឈប់ការវាយប្រហាររបស់ខ្លួន មុនពេលកិច្ចពិភាក្សាណាមួយស្តីពីការដោះលែងចំណាប់ខ្មាំងអាចចាប់ផ្តើម។ សារព័ត៌មាន Axios បាននិយាយថា ជាការឆ្លើយតប លោក បានា បាននិយាយថា ក្រុមហាម៉ាស់គួរតែដាក់អាវុធចុះ ហើយងាកមករកមេដឹកនាំរបស់ខ្លួន។ យោងតាមប្រភពនោះបានឱ្យដឹងថា ខណៈដែលប្រទេសកាតាកំពុងខិតខំប្រឹងប្រែងដើម្បីចាប់ផ្តើមកិច្ចចរចាឡើងវិញ។
កាលពីថ្ងៃទី១៩ ខែធ្នូ ប្រធានាធិបតីអ៊ីស្រាអែល លោក អ៊ីសសាក ហឺរហ្សូក បានប្រកាសថា ប្រទេសរបស់លោកបានត្រៀមខ្លួនរួចជាស្រេចសម្រាប់ការផ្អាកមនុស្សធម៌មួយផ្សេងទៀតនៅតំបន់ហ្គាហ្សាស្ទ្រីប និងការកើនឡើងនៃចំនួនជំនួយមនុស្សធម៌សម្រាប់ប្រជាជនក្នុងដែនដីនោះ ដើម្បីធានាការដោះលែងចំណាប់ខ្មាំងដែលត្រូវបានចាប់ឃុំខ្លួនដោយក្រុមហាម៉ាស់។ មេដឹកនាំអ៊ីស្រាអែលក៏បានកត់សម្គាល់ផងដែរថា ការទទួលខុសត្រូវ គឺស្ថិតនៅលើថ្នាក់ដឹកនាំរបស់ក្រុមហាម៉ាស់ទាំងស្រុង៕
ប្រភព៖ AKP
