បរទេស៖ ទូរទស្សន៍អាល់ម៉ាយ៉ាឌីន បានរាយការណ៍ថា យន្តហោះចម្បាំងអ៊ីស្រាអែលកំពុងធ្វើការវាយឆ្មក់ទម្លាក់គ្រាប់បែកយ៉ាងទូលំទូលាយនៅតំបន់ភាគខាងត្បូងនៃតំបន់ហ្គាហ្សាស្ទ្រីប។
យោងតាមការរាយការណ៍នោះបានឱ្យដឹងថា យន្តហោះអ៊ីស្រាអែលកំពុងជាប់ពាក់ព័ន្ធនឹងការទម្លាក់គ្រាប់បែកដោយមិនរើសមុខលើទីប្រជុំជនខាន់យូនីស។ ប៉ុស្តិ៍ទូរទស្សន៍នោះក៏បានរាយការណ៍ផងដែរថា កងទ័ពជើងទឹកអ៊ីស្រាអែលកំពុងវាយលុកទៅលើសង្កាត់លំនៅដ្ឋាននៅភាគកណ្តាលនៃទីក្រុង Deir al-Balah និងតំបន់ជុំវិញ។
ស្ថានការណ៍នៅមជ្ឈិមបូព៌ាបានកើនឡើងយ៉ាងខ្លាំងបន្ទាប់ពីការលុកលុយរបស់ពួកសកម្មប្រយុទ្ធហាម៉ាស់ពីតំបន់ហ្គាហ្សាស្ទ្រីបចូលទៅក្នុងប្រទេសអ៊ីស្រាអែលកាលពីថ្ងៃទី០៧ ខែតុលា អមដោយការសម្លាប់អ្នកស្រុកនៃការតាំងទីលំនៅរបស់អ៊ីស្រាអែលនៅជិតព្រំដែន និងចាប់ចំណាប់ខ្មាំងជាង ២០០នាក់ ដែលរួមមានទាំងកុមារ ស្ត្រី និងមនុស្សចាស់។ ក្រុមហាម៉ាស់ បានចាត់ទុកការវាយប្រហារនេះជាការឆ្លើយតបចំពោះសកម្មភាពរបស់អ៊ីស្រាអែលប្រឆាំងនឹងវិហារអាល់-អាកសា ក្នុងក្រុងហ្សេរុយសាឡឹម៕
ប្រភព៖ AKP
