បរទេស៖ ក្រុមចលនាហាម៉ាស់របស់ប៉ាឡេស្ទីន បានច្រានចោលនូវលទ្ធភាពនៃការផ្លាស់ប្តូរចំណាប់ខ្មាំងដែលត្រូវបានឃុំខ្លួនដោយក្រុមចលនារ៉ាឌីកាល់នេះនៅតំបន់ហ្គាហ្សាសម្រាប់ជនជាតិប៉ាឡេស្ទីនដែលជាប់គុកនៅអ៊ីស្រាអែល ដរាបណារដ្ឋជ្វីហ្វនៅតែបន្តការឈ្លានពានរបស់ខ្លួន។
អនុប្រធានក្រុមហាម៉ាស់ លោក សាឡេហ៍ អាល់-អារូរី ត្រូវបានដកស្រង់សម្តីដែលបាននិយាយនៅក្នុងសេចក្តីថ្លែងកាណ៍មួយ ដែលត្រូវបានបង្ហោះនៅក្នុងបណ្តាញតេឡេក្រាមផ្លូវការរបស់ក្រុមហាម៉ាស់ថា «នាពេលបច្ចុប្បន្ននេះ គ្មានកិច្ចចរចាណាមួយកំពុងត្រូវបានធ្វើឡើង [ជាមួយភាគីអ៊ីស្រាអែល] ទេ ហើយគោលជំហរចុងក្រោយរបស់ក្រុមហាម៉ាស គឺថានឹងមិនមានការផ្លាស់ប្តូរណាមួយឡើយ រហូតដល់ការបញ្ចប់ការឈ្លានពានពេញលេញ និងជាលើកចុងក្រោយ»។ សេចក្តីថ្លែងការណ៍ដែលត្រូវបានបង្ហោះនៅលើបណ្តាញ Telegram ផ្លូវការរបស់ចលនា។
លោក អាល់-អារូរី បាននិយាយថា ចាប់តាំងពីដើមដំបូងនៃជម្លោះនាពេលបច្ចុប្បន្ន ក្រុមហាម៉ាស់បានត្រៀមខ្លួនរួចជាស្រេចក្នុងការដោះលែងជនបរទេស ក៏ដូចជាស្ត្រី និងកុមារ ដោយគ្មានសំណងណាមួយឡើយ។
លោកបាននិយាយថា «បុគ្គលដែលនៅសល់ដែលយើងកំពុងឃុំខ្លួននៅពេលនេះ គឺជាកងទាហាន ឬអតីតយោធា ហើយនឹងមិនមានកិច្ចចរចាណាមួយអំពីការដោះលែងពួកគេទេ រហូតដល់ការឈ្លានពានត្រូវបានបញ្ឈប់»។
មន្ត្រីជាន់ខ្ពស់របស់ក្រុមហាម៉ាស់បាននិយាយបន្ថែមថា រដ្ឋាភិបាលអ៊ីស្រាអែលបានបដិសេធមិនព្រមបញ្ចប់កិច្ចព្រមព្រៀងដើម្បីផ្លាស់ប្តូរអតីតទាហាន [អ៊ីស្រាអែល] [ដែលចាប់ខ្លួនបានដោយក្រុមហាម៉ាស់] តាមលក្ខខណ្ឌផ្សេងៗនោះទេ ហើយបានបន្តការវាយប្រហាររបស់ពួកគេឡើងវិញ។
លោកបាននិយាយបន្ថែមថា «ចំណាប់ខ្មាំងមិនអាចត្រូវបានត្រឡប់មកវិញដោយអំពើហឹង្សាទេ ហើយមធ្យោបាយតែមួយគត់សម្រាប់អ៊ីស្រាអែល គឺស្វែងរកការដោះលែងតាមលក្ខខណ្ឌនៃការតស៊ូរបស់ [ប៉ាឡេស្ទីន]»៕
ប្រភព៖ AKP
