បរទេស៖ ឯកអគ្គរដ្ឋទូតដែលទើបតែងតាំងថ្មីរបស់ប្រទេសប៉ាគីស្ថានប្រចាំនៅរុស្ស៊ី លោក មូហាំម៉ាដ ខាលីប ចាម៉ាលី បានប្រាប់ទីភ្នាក់ងារសារព័ត៌មានតាសស៍នៅក្នុងបទសម្ភាសន៍មួយថា ប្រទេសប៉ាគីស្ថានបានដាក់ពាក្យស្នើសុំចូលរួមជាមួយក្រុមប្រទេសប្រ៊ីកស៍ (BRICS) នៅក្នុងឆ្នាំ២០២៤ ហើយកំពុងពឹងផ្អែកទៅលើការគាំទ្ររបស់រុស្ស៊ីក្នុងអំឡុងពេលដំណើរការសមាជិកភាពនេះ។
នៅពេលសួរថា តើប្រទេសនេះបានដាក់សំណើសុំចូលជាសមាជិកភាពនៃក្រុមប្រទេសប្រ៊ីកស៍ដែរឬទេនោះ អ្នកការទូតរូបនោះបានឆ្លើយតបថា ប្រទេសប៉ាគីស្ថានបានដាក់ពាក្យរួចហើយ។ លោកបានបញ្ជាក់ថា ទីក្រុងអ៊ីស្លាម៉ាបាដមានគម្រោងចូលរួមជាមួយក្រុមប្រទេសនេះក្រោមការដឹកនាំរបស់ប្រធានាធិបតីរុស្ស៊ីនៅក្នុងឆ្នាំ២០២៤។
លោកឯកអគ្គរដ្ឋទូតបាននិយាយបន្ថែមថា «ប្រទេសប៉ាគីស្ថានចង់ក្លាយជាផ្នែកមួយនៃស្ថាប័នដ៏សំខាន់មួយនេះ ហើយយើងកំពុងស្ថិតក្នុងដំណើរការទាក់ទងប្រទេសជាសមាជិក ដើម្បីពង្រីកការគាំទ្រដល់សមាជិកភាពរបស់ប៉ាគីស្ថានជាទូទៅ និងជាពិសេសគឺសហព័ន្ធរុស្ស៊ី»។
អនុរដ្ឋមន្ត្រីការបរទេសរុស្ស៊ី លោក ស៊ែរហ្គេយ រីយ៉ាបកូវ បាននិយាយកាលពីដើមខែតុលាថា ក្រុមប្រទេសប្រ៊ីកស៍ គ្រោងនឹងព្រមព្រៀងទៅលើបញ្ជីបេក្ខភាពសម្រាប់ឋានៈជារដ្ឋដៃគូនៅមុនពេលនៃកិច្ចប្រជុំកំពូលនាពេលខាងមុខនេះនៅទីក្រុងកាហ្សាន ក្នុងឆ្នាំ២០២៤។ យោងតាមមន្ត្រីរូបនេះបានឱ្យដឹងថា ក្នុងអំឡុងពេលធ្វើជាប្រធានក្រុមប្រទេសប្រ៊ីកស៍របស់រុស្ស៊ី ការយកចិត្តទុកដាក់ពិសេសនឹងត្រូវបានធ្វើឡើងដើម្បីពង្រីករង្វង់នៃមិត្តរបស់ក្រុមប្រទេសប្រ៊ីកស៍ ដែលរួមមានទាំងបណ្តាប្រទេសនៅអាមេរិកឡាទីនផងដែរ៕
ប្រភព៖ AKP
