បរទេស៖ យោងតាមរបាយការណ៍មួយរបស់ក្រុមប្រឹក្សារដ្ឋាភិបាលសហរដ្ឋអាម៉េរិកបានចេញផ្សាយថា អាវុធនុយក្លេអ៊ែររបស់កូរ៉េខាងជើង ចិន និងរុស្ស៊ី បន្តបង្ហាញពីគ្រោះថ្នាក់ដែលអាចកើតមានដល់សហរដ្ឋអាមេរិក និងសម្ព័ន្ធមិត្តរបស់ខ្លួន។
ក្រុមប្រឹក្សាសន្តិសុខអន្តរជាតិ (ISAB) របស់ក្រសួងការបរទេសបានចេញផ្សាយរបាយការណ៍មួយ ស្តីពីការរារាំងនៅក្នុងពិភពនៃពហុប៉ូលនុយក្លេអ៊ែរ ដោយបានសង្កត់ធ្ងន់ថា ការដោះស្រាយគ្រោះថ្នាក់ពីសត្រូវដែលមានសក្តានុពលត្រូវតែជាអាទិភាព។
របាយការណ៍នោះបាននិយាយដោយសំដៅទៅលើប្រទេសកូរ៉េខាងជើងថា «អាវុធនុយក្លេអ៊ែរនៅក្នុងដៃរបស់សត្រូវនោះ និងសត្រូវផ្សេងទៀត រួមទាំងសាធារណៈរដ្ឋប្រជាធិបតេយ្យប្រជាមានិតកូរ៉េ នៅតែបន្តបង្កគ្រោះថ្នាក់ដល់សហរដ្ឋអាមេរិក និងមិត្តជាដៃគូ និងសម្ព័ន្ធមិត្តជុំវិញពិភពលោក។ ដូច្នេះការឆ្លើយតបប្រកបដោយប្រសិទ្ធភាពចំពោះការអភិវឌ្ឍទាំងនោះត្រូវតែជាអាទិភាពរបស់ជាតិ»។
របាយការណ៍នោះបាននិយាយថា «ការបោះបង់ចោលបន្តិចម្តងៗនៃគោលការណ៍ណែនាំគ្រាប់មីស៊ីល សហរដ្ឋអាមេរិក-សាធារណរដ្ឋកូរ៉េក្នុងរយៈពេល ២ទសវត្សរ៍កន្លងមកនេះ បង្ហាញពីការថយចុះនៃភាពពាក់ព័ន្ធនៃការគ្រប់គ្រងបច្ចេកវិទ្យាក្នុងការបង្អាក់ការរីកសាយភាយរបស់សម្ព័ន្ធមិត្ត»។
នៅឆ្នាំ២០២១ ទីក្រុងសេអ៊ូល និងទីក្រុងវ៉ាស៊ីនតោនបានដកការរឹតបន្តឹងគោលការណ៍ណែនាំគ្រាប់មីស៊ីលរបស់ពួកគេ ដែលបានរារាំងកូរ៉េខាងត្បូងពីការអភិវឌ្ឍ ឬកាន់កាប់មីស៊ីលផ្លោងដែលមានរយៈចម្ងាយអតិបរមាលើសពី ៨០០គីឡូម៉ែត្រ៕
ប្រភព៖ AKP
