បរទេស៖ លោក ជូគីវ៉ាត់ អូផាស់វង្សសេ ប្រធានកិត្តិយសនៃសមាគមអ្នកនាំចេញអង្ករថៃ (TREA) បាននិយាយកាលពីពេលថ្មីៗនេះថា ប្រទេសថៃបានបង្កើនគោលដៅនាំចេញអង្កររបស់ខ្លួនសម្រាប់ឆ្នាំនេះឱ្យបានដល់ ៨,៥លានតោន។
បច្ចុប្បន្ននេះ ថៃជាប្រទេសនាំចេញអង្ករធំលំដាប់ទីពីររបស់ពិភពលោក បន្ទាប់ពីប្រទេសឥណ្ឌា។
លោក ជូគីវ៉ាត់ បាននិយាយថា អង្ករថៃឥឡូវនេះត្រូវបានលក់ក្នុងតម្លៃប្រហែល ៥៥០-៥៥៥ដុល្លារអាម៉េរិកក្នុងមួយតោន ដែលទាបជាងប្រទេសប្រកួតប្រជែងដទៃទៀត ដូច្នេះហើយបានជាប្រទេសមួយចំនួន ដូចជាប្រទេសហ្វីលីពីន និងឥណ្ឌូណេស៊ី កំពុងបង្កើនការបញ្ជាទិញអង្ករថៃ។
លោកបានបង្ហើបឱ្យដឹងថា ផលិតកម្មស្រូវរបស់ប្រទេសថៃនៅក្នុងឆ្នាំនេះ មានការប៉ះពាល់តិចតួចប៉ុណ្ណោះពីបាតុភូតអាកាសធាតុអ៊ែលនីណូ។ រដូវកាលឆ្នាំ២០២៣-២០២៤ ត្រូវបានគេរំពឹងថានឹងផ្តល់ទិន្នផលពី ៣៣-៣៤លានតោន ដោយកើនឡើង ២លានតោនធៀបនឹងរយៈពេលដូចគ្នាកាលពីឆ្នាំមុន។
ក្នុងអំឡុងពេលខែមករាដល់ខែកញ្ញា ប្រទេសថៃលក់អង្ករបានចំនួន ៦,០៨លានតោន ដោយកើនឡើងបាន ១២% ធៀបនឹងឆ្នាំមុន។
ទោះបីជាយ៉ាងណាក៏ដោយ លោក ជូគីវ៉ាត់ បានព្យាករណ៍ថា ការនាំចេញអង្កររបស់ប្រទេសថៃនឹងធ្លាក់ចុះមកនៅត្រឹម ៧,៥លានតោនក្នុងឆ្នាំ២០២៤ ខណៈដែលប្រទេសនាំចេញអង្ករកំពូលរបស់ពិភពលោក គឺប្រទេសឥណ្ឌានោះ ទំនងជានឹងបន្ធូរបន្ថយការហាមឃាត់ការនាំចេញអង្កររបស់ខ្លួន៕
ប្រភព៖ AKP
