បរទេស៖ មជ្ឈមណ្ឌលជំនួយសរុបចំនួន ៨.៤៨១កន្លែងដែលអាចផ្ទុកមនុស្សបានជាង ២,១លាននាក់ត្រូវបានបង្កើតឡើងដើម្បីត្រៀមទប់ទល់នឹងគ្រោះទឹកជំនន់ក្នុងរដូវខ្យល់មូសុងឦសាននៅក្នុងប្រទេសម៉ាឡេស៊ី។ នេះបើយោងតាមរដ្ឋមន្ត្រីនៃនាយកដ្ឋាននាយករដ្ឋមន្ត្រី លោក អាមីហ្សាន់ ម៉ូដ អាលី។
មន្ត្រីនោះបាននិយាយថា ក្នុងចំណោមមជ្ឈមណ្ឌលសង្គ្រោះសរុបនោះ មជ្ឈមណ្ឌលចំនួន ៣៣២កន្លែងដែលអាចផ្ទុកមនុស្សបាន ១២៩.០៩៦នាក់មានទីតាំងនៅក្នុងរដ្ឋសាបាហ៍។
ប្រទេសម៉ាឡេស៊ីចង់ចាត់វិធានការយ៉ាងសកម្មក្នុងការឆ្លើយតបគ្រោះមហន្តរាយជាតិដោយលោក អាមីហ្សាន់ បានសង្កត់ធ្ងន់ថា ជារៀងរាល់ឆ្នាំ ទីភ្នាក់ងារដែលមានការអនុញ្ញាតធ្វើការរៀបចំ រួមទាំងការបង្កើតមជ្ឈមណ្ឌលសង្គ្រោះដើម្បីឆ្លើយតបប្រកបដោយប្រសិទ្ធភាពចំពោះលទ្ធភាពអាក្រក់ដែលអាចកើតមាន។
លោកបាននិយាយបន្តថា ការសាងសង់មជ្ឈមណ្ឌលសង្គ្រោះមានសម្ភារៈបរិក្ខារល្អប្រសើរបើធៀបនឹងមជ្ឈមណ្ឌលសង្គ្រោះបណ្ដោះអាសន្ន ដោយមានគោលបំណងផ្តល់ហេដ្ឋារចនាសម្ព័ន្ធអចិន្ត្រៃយ៍សម្រាប់ជនរងគ្រោះដែលស្វែងរកទីជម្រកបណ្ដោះអាសន្ន។
នៅពេលដាក់ចេញនូវការប៉ាន់ប្រមាណថវិកាឆ្នាំ២០២៤ នៅក្នុងខែតុលា នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាននិយាយថា រដ្ឋាភិបាលនឹងផ្តល់មជ្ឈមណ្ឌលបែបនេះនៅក្នុងរដ្ឋចំនួន៩ ដែលរងផលប៉ះពាល់ជាញឹកញាប់ដោយគ្រោះទឹកជំនន់។
យោងតាមអគ្គនាយកនៃនាយកដ្ឋានឧតុនិយមម៉ាឡេស៊ី (METMMalaysia) លោក មូហាំម៉ាដ ហ៊ែលមី អាប់ឌុលឡា បានឱ្យដឹងថា ភ្លៀងធ្លាក់ខ្លាំងពី ៤ ទៅ ៦វគ្គ ត្រូវបានព្យាករណ៍នៅក្នុងរដូវខ្យល់មូសុងឦសាន ដែលត្រូវបានរំពឹងទុកចាប់ពីថ្ងៃទី១១ ខែវិច្ឆិកា រហូតដល់ខែមីនា ឆ្នាំ២០២៤៕
ប្រភព៖ AKP
