បរទេស៖ អាស៊ាន និងប្រទេសអាល្លឺម៉ង់ បានព្រមព្រៀងគ្នាក្នុងការបង្កើនកិច្ចខិតខំប្រឹងប្រែងដើម្បីពង្រឹងភាពជាដៃគូអភិវឌ្ឍន៍របស់ប្រទេសទាំងពីរ។
កាលពីពេលថ្មីៗនេះ មន្ត្រីនៃភាគីទាំងពីរបានជួបប្រជុំគ្នាសម្រាប់កិច្ចប្រជុំគណៈកម្មាធិការភាពជាដៃគូអភិវឌ្ឍន៍អាស៊ាន-អាល្លឺម៉ង់ (AG-DPC) លើកទី៧ នៅទីស្នាក់ការកណ្តាលអាស៊ាននៅទីក្រុងហ្សាការតា។
កិច្ចប្រជុំនោះបានកត់សម្គាល់អំពីវឌ្ឍនភាពសំខាន់ៗក្នុងការអនុវត្តកិច្ចសហប្រតិបត្តិការជាក់ស្តែងរវាងអាស៊ាន-អាល្លឺម៉ង់ (PCA) សម្រាប់ឆ្នាំ២០២៣-២០២៧។ ប្រមាណជិត ៦៩% នៃបន្ទាត់សកម្មភាពរបស់ PCA ត្រូវបាន ឬកំពុងត្រូវបានដោះស្រាយចាប់តាំងពីការអនុម័តរបស់ខ្លួនកាលពីឆ្នាំមុនមក។
អាស៊ាន និងប្រទេសអាល្លឺម៉ង់ បានកត់សម្គាល់អំពីកិច្ចសហប្រតិបត្តិការដ៏រឹងមាំក្នុងវិស័យមួយចំនួន ដូចជាការប្រឆាំងអំពើភេរវកម្ម និងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ពាណិជ្ជកម្ម និងការវិនិយោគ ការលើកកម្ពស់សហគ្រាសធុនតូច និងមធ្យម (MSMEs) ទេសចរណ៍ ការអភិវឌ្ឍធនធានមនុស្ស អាហារ កសិកម្ម រុក្ខាប្រមាញ់ និងកសិផល កិច្ចសហប្រតិបត្តិការអាកាសធាតុ និងកិច្ចការពារបរិស្ថាន ការគ្រប់គ្រងកាកសំណល់ ជំនួយមនុស្សធម៌ និងការអភិវឌ្ឍប្រកបដោយចីរភាព។
ដើម្បីឆ្ពោះទៅមុខ ពួកគេបានព្រមព្រៀងគ្នាបន្តពង្រឹងកិច្ចសហប្រតិបត្តិការលើវិស័យដែលមានផលប្រយោជន៍ទៅវិញទៅមក រួមទាំងសន្តិសុខសាយប័រ សន្តិសុខថាមពល វប្បធម៌ និងការផ្លាស់ប្តូររវាងប្រជាជន កិច្ចសហប្រតិបត្តិការយុវជន វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងការតភ្ជាប់ជាដើម។
កិច្ចប្រជុំនោះក៏បានពិភាក្សាគ្នាអំពីកិច្ចសហប្រតិបត្តិការក្រោមចក្ខុវិស័យអាស៊ាន ស្តីពីតំបន់ឥណ្ឌូ-ប៉ាស៊ីហ្វិកផងដែរ។ ភាគីទាំងពីរបានផ្លាស់ប្តូរយោបល់គ្នាជុំវិញបញ្ហាតំបន់ និងអន្តរជាតិ ដែលមានផលប្រយោជន៍រួម និងជាកង្វល់រួម៕
ប្រភព៖ AKP
