បរទេស៖ មន្ត្រីម្នាក់បាននិយាយថា ប្រទេសឥណ្ឌូណេស៊ីកំពុងធ្វើការងារដើម្បីពង្រឹងផលិតផលដែលផលិតក្នុងស្រុក រួមទាំងផលិតផលដែលផលិតដោយសហគ្រាសមីក្រូ ខ្នាតតូច និងមធ្យម (MSMEs) ដោយអនុវត្តគោលនយោបាយសេដ្ឋកិច្ចចំនួន៤។
រដ្ឋមន្ត្រីក្រសួងសហករណ៍ និងសហគ្រាសធុនតូច និងមធ្យម លោក តេទែន ម៉ាស់ឌូគី បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃទី២៤ ខែតុលាថា ប្រធានាធិបតីឥណ្ឌូណេស៊ី លោក ចូកូ វីដូដូ ថែមទាំងបានអះអាងទៀតថា ការចំណាយថវិការដ្ឋចំនួន ៤០% នឹងត្រូវបែងចែកសម្រាប់ការទិញផលិតផលក្នុងស្រុកពី MSMEs។
លោក ម៉ាស់ឌូគី បានកត់សម្គាល់ថា តាមរយៈគោលនយោបាយជំនួសឱ្យការនាំចូលនេះ ប្រទេសឥណ្ឌូណេស៊ីនឹងលែងត្រូវការនាំចូលផលិតផលដែលខ្លួនអាចផលិតបាន ដើម្បីបំពេញតម្រូវការក្នុងស្រុក។
លោកបាននិយាយបន្ថែមថា ផលិតផលដែលផលិតដោយក្រុមហ៊ុនបរទេសនៅក្នុងប្រទេសឥណ្ឌូណេស៊ីគួរតែមានកម្រិតសមាសភាគក្នុងស្រុក ៤០% ហើយពួកគេក៏មានកាតព្វកិច្ចក្នុងការធ្វើជាដៃគូជាមួយក្រុមហ៊ុនក្នុងស្រុកផងដែរ។
គោលនយោបាយទី២ គឺដើម្បីការពារក្រុមហ៊ុនធុរកិច្ចក្នុងស្រុក គឺការធ្វើឧស្សាហូបនីយកម្មនៃធនធានធម្មជាតិ។ វាមិនត្រឹមតែសម្រាប់ក្រុមហ៊ុនខ្នាតធំប៉ុណ្ណោះទេ ប៉ុន្តែក៏ត្រូវតែមានការចូលរួមពី MSMEs ក្នុងស្រុកផងដែរ។ គោលការណ៍នេះក៏បានហាមឃាត់ការនាំចេញផលិតផលរ៉ែឆៅ ដែលត្រូវតែកែច្នៃក្នុងស្រុកដើម្បីបង្កើនតម្លៃបន្ថែម និងបង្កើតការងារផងដែរ។
គោលនយោបាយទី៣ គឺការកែលម្អលទ្ធភាពទទួលបានហិរញ្ញប្បទានរបស់សហគ្រាសធុនតូច និងមធ្យម ខណៈដែលបច្ចុប្បន្នចំណែកនៃឥណទានធនាគារសម្រាប់សហគ្រាសធុនតូច និងមធ្យម មានត្រឹមតែ ២១% ប៉ុណ្ណោះ ដែលនៅមានកម្រិតទាបជាងប្រទេសថៃ និងម៉ាឡេស៊ី ដែលវាមានលើសពី ៤០%។
គោលនយោបាយសេដ្ឋកិច្ចទី៤ ទាក់ទងនឹងការផ្លាស់ប្តូរឌីជីថលដែលគ្រប់គ្រងទិដ្ឋភាពចំនួនបួន គឺវេទិកាសម្រាប់ធុរកិច្ច លំហូរនៃការនាំចូលទំនិញប្រើប្រាស់ ប្រព័ន្ធពាណិជ្ជកម្ម និងការប្រកួតប្រជែងនៃផលិតផល MSME ក្នុងស្រុក៕
ប្រភព៖ AKP
