បរទេស៖ ក្រុមហ៊ុនវិស្វកម្មកំពង់ផែចិន (CHEC) ចាប់អារម្មណ៍ទៅលើគម្រោងសាងសង់ស្ពានអាកាសតម្លៃ ១ទ្រីលានបាត (២៧,៤ប៊ីលានដុល្លារអាម៉េរិក) ដែលនឹងតភ្ជាប់ឈូងសមុទ្រថៃ និងសមុទ្រអាន់ដាំមែន។ នេះបើយោងតាមការចេញផ្សាយរបស់រដ្ឋាភិបាលថៃ។
អ្នកនាំពាក្យរដ្ឋាភិបាលថៃ លោក ចៃ វ៉ាចារ៉ុនកេ បាននិយាយថា ប្រធានក្រុមហ៊ុន CHEC លោក វ៉ាង តុងហ្ស៊ូ បានបង្ហាញចំណាប់អារម្មណ៍នេះក្នុងអំឡុងពេលជួបជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន នៅក្នុងទីក្រុងប៉េកាំង កាលពីសប្តាហ៍មុន។
លោក សេដ្ឋា ដែលបានទៅបំពេញទស្សនកិច្ចនៅប្រទេសចិនដើម្បីចូលរួមវេទិកាខ្សែក្រវាត់ និងផ្លូវ បានស្វាគមន៍ចំពោះការចាប់អារម្មណ៍មួយនេះ និងបានស្នើឱ្យក្រុមហ៊ុនធ្វើការពិភាក្សាអំពីសិទ្ធិផ្សព្វផ្សាយជាមួយក្រុមប្រឹក្សាវិនិយោគនៃប្រទេសថៃ។
គម្រោងដែលរំពឹងទុកសម្រាប់ខេត្តជុមផន និងខេត្តរ៉ាណុង ដែលស្នើឡើងដំបូងដោយរដ្ឋាភិបាលមុន ត្រូវបានគេរំពឹងថានឹងបញ្ចប់នៅក្នុងឆ្នាំ២០៣៩ ដើម្បីជួយសម្រួលដល់ការដឹកជញ្ជូនរវាងឈូងសមុទ្រថៃ និងសមុទ្រអានដាំមែន។ នេះបើយោងតាមការឱ្យដឹងរបស់លោក ចៃ។
តាមការគ្រោងទុកនៃភាពជាដៃគូរវាងវិស័យសាធារណៈ និងវិស័យឯកជន គម្រោងនេះនឹងរួមបញ្ចូលនូវកំពង់ផែទឹកជ្រៅនៅក្នុងខេត្តជុមផន និងខេត្តរ៉ាណុង ផ្លូវល្បឿនលឿនអន្តរទីក្រុង បំពង់បង្ហូរប្រេង និងផ្លូវរថភ្លើងទៅមក។
រដ្ឋាភិបាលថៃនឹងធ្វើការបង្ហាញផ្លូវដើម្បីផ្សព្វផ្សាយគម្រោងនេះដល់អ្នកវិនិយោគចាប់ពីខែវិច្ឆិកាដល់ខែមករាឆ្នាំក្រោយ។ ការដកហូតដីតាមផ្លូវច្បាប់ត្រូវបានគេរំពឹងថានឹងធ្វើឡើងចាប់ពីខែមករា ឆ្នាំ២០២៥ ដល់ខែធ្នូ ឆ្នាំ២០២៦។
រដ្ឋាភិបាលនឹងទទួលសំណើវិនិយោគពីអ្នកដេញថ្លៃអន្តរជាតិចាប់ពីខែមេសាដល់ខែមិថុនាឆ្នាំ២០២៥ ហើយប្រកាសអ្នកឈ្នះសម្រាប់ការដេញថ្លៃនេះនៅក្នុងខែសីហាឆ្នាំដដែល។ គម្រោងនេះត្រូវបានរំពឹងទុកថានឹងចាប់ផ្តើមការសាងសង់នៅក្នុងខែកញ្ញា ឆ្នាំ២០២៥៕
ប្រភព៖ AKP
