បរទេស៖ សមាគមប្រជាជាតិអាស៊ីអាគ្នេយ៍ (អាស៊ាន) បានចេញសេចក្តីថ្លែងការណ៍រួមមួយ ដោយជំរុញឱ្យបញ្ឈប់ជាបន្ទាន់នូវអំពើហិង្សានៅមជ្ឈិមបូព៌ា ដើម្បីជៀសវាងការស្លាប់ និងរបួសមនុស្សបន្ថែមទៀត និងអំពាវនាវឱ្យមានការគោរពពេញលេញនៃច្បាប់មនុស្សធម៌អន្តរជាតិ។
នៅក្នុងសេចក្តីថ្លែងការណ៍រួមនោះ បណ្តារដ្ឋមន្ត្រីការបរទេសអាស៊ានបានសម្តែងការព្រួយបារម្ភចំពោះការកើនឡើងនៃជម្លោះប្រដាប់អាវុធនៅមជ្ឈិមបូព៌ាកាលពីពេលថ្មីៗនេះ ហើយបានថ្កោលទោសយ៉ាងដាច់អហង្ការចំពោះអំពើហឹង្សាដែលនាំទៅដល់ការស្លាប់ និងរបួសជនស៊ីវិល រួមទាំងជនជាតិអាស៊ានផងដែរ។
បណ្តារដ្ឋមន្ត្រីទាំងនោះបានអំពាវនាវឱ្យភាគីទាំងអស់បង្កើតច្រករបៀងមនុស្សធម៌ដែលមានសុវត្ថិភាព ឆាប់រហ័ស និងគ្មានការរារាំង។
ពួកគេបានអះអាងសារជាថ្មីនូវការគាំទ្រចំពោះដំណោះស្រាយកិច្ចចរចារដ្ឋពីរ ដែលអនុញ្ញាតឱ្យទាំងប្រទេសអ៊ីស្រាអែល និងប៉ាឡេស្ទីនរស់នៅក្បែរគ្នាក្នុងសន្តិភាព និងសន្តិសុខស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលពាក់ព័ន្ធ។ ពួកគេបាននិយាយថា នេះនឹងជាផ្លូវដែលអាចសម្រេចបានតែមួយគត់ ដើម្បីដោះស្រាយមូលហេតុនៃជម្លោះ។
បណ្តារដ្ឋមន្ត្រីអាស៊ានបានអំពាវនាវឱ្យភាគីទាំងអស់ការពារ និងធានាសុវត្ថិភាព និងសន្តិសុខសម្រាប់ជនស៊ីវិលទាំងអស់ រួមទាំងជនជាតិអាស៊ានផងដែរ ព្រមទាំងដោះលែងចំណាប់ខ្មាំងទាំងអស់ជាបន្ទាន់ និងដោយគ្មានលក្ខខណ្ឌ។
ពួកគេក៏បានជំរុញដល់សហគមន៍អន្តរជាតិឱ្យគាំទ្រដល់ដំណើរការសន្តិភាព ដើម្បីធានាបាននូវសន្តិភាព និងស្ថិរភាពយូរអង្វែងនៅក្នុងតំបន់៕
ប្រភព៖ AKP
