បរទេស៖ អភិបាលស្តីទីកោះបាលី លោក សាង ម៉ាដេ ម៉ាហេនដ្រា ចាយ៉ា បានកំណត់ស្ថានភាពប្រកាសអាសន្ននៅលើកោះនេះសម្រាប់រយៈពេល ១៤ថ្ងៃចាប់ពីថ្ងៃទី១៩ ខែតុលា ដើម្បីឆ្លើយតបទៅនឹងស្ថានភាពគ្រោះអគ្គីភ័យ និងគ្រោះរាំងស្ងួតនាពេលថ្មីៗនេះ។
លោក ចាយ៉ា បាននិយាយថា បន្ទាប់ពីពិនិត្យមើលការអភិវឌ្ឍនៃស្ថានភាពដែលមានស្រាប់សម្រាប់កិច្ចការពារសហគមន៍ ការកែលម្អការត្រៀមខ្លួន និងការបន្ធូរបន្ថយការចូលទៅប្រើប្រាស់ រដ្ឋបាលមូលដ្ឋានបានយល់ព្រមបង្កើតស្ថានភាពប្រកាសអាសន្នសម្រាប់រយៈពេល ១៤ថ្ងៃ ដោយចាប់ផ្តើមពីថ្ងៃទី១៩ ខែតុលា។
លោក ចាយ៉ា បានបញ្ជាក់ថា រដ្ឋបាលកោះបាលីកំពុងខិតខំពន្លឿនជំហាន ដើម្បីពន្លត់អគ្គីភ័យដែលកំពុងកើតឡើងនាពេលបច្ចុប្បន្ន និងបន្តចែកចាយជំនួយដល់តំបន់ដែលជួបប្រទះវិបត្តិទឹកស្អាតដោយសារគ្រោះរាំងស្ងួតផងដែរ។
ទន្ទឹមនឹងនេះដែរ នៅក្នុងកិច្ចប្រជុំសម្របសម្រួលមួយជាមួយទីភ្នាក់ងារកាត់បន្ថយគ្រោះមហន្តរាយជាតិ (BNPB) ប្រធានទីភ្នាក់ងារកាត់បន្ថយគ្រោះមហន្តរាយនៅកោះបាលី (BPBD) លោក ម៉ាដេ រេនទីន បានស្នើសុំឧបករណ៍បន្ថែមទៀតដែលជាតម្រូវការសម្រាប់ដោះស្រាយគ្រោះរាំងស្ងួតក្នុងអំឡុងពេលដែលមានស្ថានភាពអាសន្ននេះ។ លោកក៏បានស្នើសុំជំនួយពីទីភ្នាក់ងារ BNPB ក្នុងការអនុវត្តបច្ចេកវិទ្យាកែប្រែអាកាសធាតុ ដើម្បីផលិតភ្លៀងសិប្បនិម្មិតនៅកោះបាលីដែរ។
លោកបានបញ្ជាក់ថា ស្រុកចំនួន៣ ក្នុងខេត្តកោះបាលី មិនមានភ្លៀងធ្លាក់ជិត ១០០ថ្ងៃជាប់គ្នាហើយ។
មន្ត្រីរូបនេះបានចាត់ទុកថា វាមានសារៈសំខាន់ណាស់ក្នុងការដោះស្រាយគ្រោះមហន្តរាយជាបន្ទាន់នៅកោះបាលី ព្រោះវាជាទីតាំងសម្រាប់ព្រឹត្តិការណ៍អន្តរជាតិមួយចំនួន៕
ប្រភព៖ AKP
