បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅក្នុងកិច្ចពិភាក្សារវាងរុស្ស៊ី-ចិនថា ពាណិជ្ជកម្មរបស់ទីក្រុងមូស្គូជាមួយទីក្រុងប៉េកាំងបានឈានដល់តម្លៃ ២០០ប៊ីលានដុល្លារអាម៉េរិកនៅឆ្នាំ២០២៣ នេះ ហើយបានកំណត់ឱ្យបានលើសពីនេះបន្ថែមទៀត។
មេដឹកនាំរុស្ស៊ីបាននិយាយទៅកាន់មេដឹកនាំចិន លោក ស៊ី ជីនពីង ថា «អ្នកទើបតែបានលើកឡើងអំពីគោលដៅរបស់យើងក្នុងការសម្រេចបានពាណិជ្ជកម្ម ២០០ប៊ីលានដុល្លារនៅក្នុងឆ្នាំនេះ។ ដូច្នេះ ពីមួយឆ្នាំទៅមួយឆ្នាំ ដូចដែលយើងបានវិភាគវាកាលពីល្ងាចមិញ យើងបានសម្រេចហើយក្នុងតម្លៃ ២០០ប៊ីលានដុល្លារអាម៉េរិកក្នុងរយៈពេលមួយឆ្នាំចាប់តាំងពីកាលបរិច្ឆេទនេះ។ ហើយយើងដឹងថាវាពិតជានឹងតម្លៃលើសពីនេះ»។
នៅក្នុងកាលៈទេសៈដ៏លំបាកនាពេលបច្ចុប្បន្ន លោក ពូទីន បាននិយាយថា «ការសម្របសម្រួលគោលនយោបាយការបរទេសជិតស្និទ្ធជាពិសេស គឺជាតម្រូវការ» ហើយនេះ គឺជារបៀបដែលប្រទេសរុស្ស៊ី និងចិន បាននិងកំពុងកសាងកិច្ចសហប្រតិបត្តិការរបស់ពួកគេ។
លោកបានកោតសរសើរចំពោះអ្វីដែលលោកបាននិយាយថា គឺជាវឌ្ឍនភាពដ៏ល្អនៃគំនិតផ្តួចផ្តើមដែលប្រទេសចិនបានចាប់ផ្តើមកាលពីមួយទសវត្សរ៍មុន ដើម្បីពង្រឹងកិច្ចសហប្រតិបត្តិការរវាងប្រទេសដែលបង្កើតផ្លូវសូត្របុរាណ។
លោក ពូទីន បានសង្កត់ធ្ងន់ថា «ក្រោមការដឹកនាំរបស់អ្នក ប្រទេសចិនបាននិងកំពុងធ្វើឱ្យវាមានដំណើរការល្អ។ យើងរីករាយណាស់សម្រាប់អ្នក និងសម្រាប់អ្នករាល់គ្នាដែលចូលរួមក្នុងកិច្ចសហប្រតិបត្តិការដ៏ទូលំទូលាយនេះ ពីព្រោះមនុស្សគ្រប់គ្នាទទួលបានអត្ថប្រយោជន៍ពីវា»៕
ប្រភព៖ AKP
