បរទេស៖ យោងតាមទីភ្នាក់ងារស្ថិតិកណ្តាលរបស់ប្រទេសឥណ្ឌូណេស៊ី (BPS) បានឱ្យដឹងថា ផលិតកម្មស្រូវរបស់ប្រទេសឥណ្ឌូណេស៊ីក្នុងឆ្នាំ២០២៣ នឹងកាត់បន្ថយចំនួន ៦៥០.០០០តោន ឬ ២,០៥% បើធៀបទៅនឹងឆ្នាំមុន។
ទិន្នផលស្រូវនៅក្នុងឆ្នាំនេះត្រូវបានគេប៉ាន់ប្រមាណថានឹងមានដល់ទៅ ៣០,៩លានតោន។ ទិន្នន័យរបស់ទីភ្នាក់ងារ BPS បានបង្ហាញថា ផលិតកម្មស្រូវចាប់ពីខែតុលាដល់ខែធ្នូ ត្រូវបានគេព្យាករណ៍ថានឹងថយចុះ ១០,៩២% មកនៅត្រឹម ៤,៧៨លានតោន បើធៀបទៅនឹងការផលិតកាលពីឆ្នាំមុនដែលមានចំនួន ៥,៣៧លានតោន។
ថ្លែងក្នុងសន្និសីទសារព័ត៌មានមួយកាលពីថ្ងៃទី១៦ ខែតុលា ប្រធានស្តីទីនៃទីភ្នាក់ងារ BPS លោកស្រី អាម៉ាលីយ៉ា អាឌីនីងហ្ការ វីឌីយ៉ាសាន់ទី បាននិយាយថា ផ្ទៃដីផលិតកម្មស្រូវរបស់ប្រទេសឥណ្ឌូណេស៊ីត្រូវបានគេប៉ាន់ស្មានថានឹងកាត់បន្ថយចំនួន ២,៤៥% ពី ១០,៤៥លានហិកតាកាលពីឆ្នាំមុនមកនៅត្រឹម ១០,២លានហិកតានៅក្នុងឆ្នាំនេះ។
លោកស្រី អាម៉ាលីយ៉ា បាននិយាយថា តំបន់ដាំស្រូវដែលបានកាត់បន្ថយភាគច្រើន គឺនៅក្នុងខេត្តផលិតស្រូវធំៗចំនួន៣ គឺខេត្តកោះជ្វាខាងលិច ខេត្តកោះជ្វាកណ្តាល និងខេត្តកោះស៊ូឡាវេស៊ីខាងត្បូង។
គ្រោះរាំងស្ងួតបានអូសបន្លាយពេល ដែលបណ្តាលឱ្យបាត់បង់ដំណាំនៅក្នុងតំបន់ទាំងនោះក្នុងប្រទេសឥណ្ឌូណេស៊ី។
លោកស្រី អាម៉ាលីយ៉ា បាននិយាយបន្ថែមថា ស្រដៀងទៅនឹងប្រទេសឥណ្ឌូណេស៊ីដែរ ប្រទេសផលិតអង្ករផ្សេងៗទៀត ដូចជាប្រទេសឥណ្ឌា ថៃ និងវៀតណាម ក៏ប្រឈមមុខនឹងការធ្លាក់ចុះនៃទិន្នផលដោយសារតែបាតុភូតអាកាសធាតុអ៊ែលនីណូ និងអាកាសធាតុស្ងួតផងដែរ។
កាលពីមុន រដ្ឋាភិបាលឥណ្ឌូណេស៊ីបានដឹកនាំទីភ្នាក់ងារភស្តុភាររដ្ឋ (Bulog) ឱ្យទិញអង្ករបន្ថែមចំនួន ២លានតោននៅឆ្នាំក្រោយ ដើម្បីធានាបាននូវទុនបម្រុងអង្ករជាតិ និងឆ្លើយតបភ្លាមៗចំពោះរដូវច្រូតកាត់ដែលអាចធ្វើទៅបានដោយសារឥទ្ធិពលពីបាតុភូតអាកាសធាតុអ៊ែលនីណូ។
បច្ចុប្បន្ននេះ ប្រទេសវៀតណាម និងថៃ នឹងក្លាយជាអ្នកផ្គត់ផ្គង់អង្ករសំខាន់ពីរសម្រាប់ប្រទេសឥណ្ឌូណេស៊ីនៅក្នុងឆ្នាំនេះ៕
ប្រភព៖ AKP
